شاخەوانێکی کورد بەسەر لووتکەی شاخی پیرۆ سەردەکەوێت

ئاڤا نیوز

شاخەوانێکی کوردی تەمەن 67 ساڵ بەسەر لووتکە شاخێکی ئەمریکای باشوور سەردەکەوێت کە بەرزییەکەی نزیکەی پێنج هەزار و 500 مەترە.

چیرۆکی سەرەکی: لە ناوەراستی مانگی ڕابردوو محەممەد باوەکر، شاخەوانی کورد گەشتی وڵاتی پیرۆی کردووە کە دەکەوێتە کیشوەری ئەمریکای باشوور، ئەو شاخەوانە کوردە گەشتی لووتکە شاخێکی لەو وڵاتە کردووە، لە دووەم سەرکەوتنیش دوای زیاتر لە شەش هەزار مەتر بەرزبوونەوە لە ئاستی ڕووی دەریا، بەهۆی زریانەوە گەشتەکەی تەواو نەکردووە و خۆی و تیمەکەی گەڕاونەتە خوارەوە.

لیدوانی فەرمی: ئازاد گەردی، سەرۆکی ڕێکخراوی شاخەوانیی هەڵۆ بە ئاڤا میدیای گوت: محەممەد باوەکر دوای ئەوەی بۆ تێستی جەستەیی و ڕاهاتن توانی بەسەر لووتکە شاخی (چروپ) سەربکەوێت کە یەكێکە لە لووتکە شاخەکانی زنجیرە چیای ئەندێز و بەرزیەکەی پێنج هەزار و 495 مەترە.

زانیاریی زیاتر: دووەم گەشتی ئەم شاخەوانە کوردە بەرەو لووتکە شاخی (هۆسکاران) بوو کە بەرزییەکەی شەش هەزار و 768 مەتر لە ئاستی ڕووی دەریا بەرزە. محەممەد باوەکر و تیمی یاوەری لە لوتکەی بەفراوی لە کۆردیلێرا بلانکا لە ڕۆژهەڵاتی شارۆچکەی یونگای پیرۆ دەستییان بە گەشتەکەیان کرد، دوای بڕینی زیاتر لە شەش هەزار مەتر کە تەنیا 200 بۆ 300 مەتریان مابوو بۆ لوتکەکە، بەهۆی هەڵکردنی زریانی زۆر و کەوتنەخوارەوەی پەیژەی ئەلەمنیۆمی پەڕینەوە لە چاڵە بەفرینە قوڵەکان، گەشتەکەیان تەواو نەکرد و گەڕانەوە خوارەوە.

ئەوەی پێویستە بیزانیت: هۆسکاران، چوارەم بەرزترین لووتکە شاخە لە ئەمریکای باشوور و دەکەوێتە ناوەڕاستی وڵاتی پیرۆ، شوێنێکی گەشتیارییە و ساڵانە ژمارەیەکی زۆر لە گەشتییاران و شاخەوانان لە هەموو جیهان ڕووی تێدەکەن.

باکگراوند: محەممەد باوەکر، شاعیر و نووسەری هەرێمی کوردستانە و ژمارەیەک کتێبی چاپ و بڵاوکردووەتەوە، لە ساڵی 2018 ەوە لەڕێگەی ڕێکخراوی شاخەوانی هەڵۆ دەستی بە شاخەوانی کردووە، گەشتی ژمارەیەک وڵاتی کردووە و بەسەر ژمارەیەک لوتکە شاخی بەرز لە هەرێمی کوردستان و وڵاتانی جیهان سەرکەوتووە، تا ئێستا دوو کتێبیشی دەربارەی شاخەوانی چاپ کردووە.