ئاڤا میدیا خەڵاتی دیجیدەی نێودەوڵەتی لە نیویۆرک دەباتەوە

گرووپی میدیایی ئاڤا بە خۆشحاڵییەوە ڕایدەگەیەنێت کە توانی خەڵاتی نێودەوڵەتی دیجیدەی (Digiday) لە شاری نیویۆرکی ئەمریکا بۆ کاری مرۆیی بەدەستبهێنێت، خەڵاتەکە تایبەتە بەو میدیایانەی کاری نوێ و داهێنەرانە ئەنجامدەدەن.

ئاڤا میدیا بە بەرنامەی خۆری ئاڤا، کە لەلایەن ئەستێرەی کەناڵەکەمان هەژان هێرش پێشکەش دەکرێت، بەشداری پێشبڕکێکەی کرد و خۆشبەختانە توانیمان خەڵاتەکە بە دەستبهێنین. بەرنامەی خۆری ئاڤا یەکێکە لە بەرنامە تایبەتەکانی ئاڤا میدیا، بە پاڵپشتی دەزگای خێرخوازی حاجی ئیدریس سورچی، کە توانیویەتی پردێکی گرنگ بێت لە نێوان کەسانی کەمدەرامەت و خێرخوازاندا.

ئاڤا میدیا پیرۆزبایی لە خۆی و کارمەندان و تەواوی بینەرانی دەکات بە بۆنەی ئەم سەرکەوتنە گەورەیەوە، کە لە ماوەی ساڵێکی تەمەنیدا ئەمە سێیەم خەڵاتی نێودەوڵەتییە بە دەستی بهێنێت، ئەمەش سەلمێنەری ئەو راستییە کە کارەکانمان نە کراوەو نە بینراوەن.

ئەم خەڵاتانە دەرخەری ئەو راستییەشن کارەکانی ئاڤا میدیا نەک تەنها لەسەر ئاستی ناوخۆ، بەڵکو لەسەر ئاستی نێودەوڵەتیش جێگەی نرخاندن و پێزانینە. هاوکات راشیدەگەیەنین سوپرایزی دیکە بەڕێوەیە و دڵنیاین لە خۆمان کە بەشداریی هەر پێشبڕکێییەکی دیکە بکەین براوە دەبین.