زیاتر لە 20 هەزار خانەنشین شەش مووچەی ئیکرامیە وەردەگرن

ئاڤا نیوز

لەگەڵ مووچەی مانگی هەشتدا، مووچە بۆ 400 خانەنشینی نوێ بەستراوە و هەشت مووچە بەیەکەوە وەردەگرن، هاوکات 850 خانەنشینی دیکە کە مابوونەوە، ناویان لەگەڵ لیستی مووچەی مانگی نۆ بۆ بەغدا نێردراوە. بڕیارە ئەوانیش لەگەڵ مووچەی مانگی نۆدا، مووچەیان بۆ ببەسترێت و نۆ مووچە بەیەکەوە وەربگرن، بەمەش هیچ خانەنشینێکی نوێ نامێنێت کە مووچەی بۆ نەبەسترابێت.

وێنە گەورەکە: لە سەرەتای ئەمساڵەوە 27 هەزار فەرمانبەر خانەنشێن بوون، نزیکەی 17 هەزار لە سنووری پارێزگاکانی هەولێر و دهۆک ، 10 هەزاریشیان لە سنووری سلێمانی، سەرجەمیان 180 ڕۆژ مۆڵەتی کۆکراوەیان هەیە و شەش مووچەی بنەڕەتی ئیکرامییە دەیانگرێتەوە، خانەنشینانی سنووری سلێمانی سەرجەمیان لە مانگەکانی ڕابردوودا شەش مووچەکەیان وەرگرتووە، خانەنشینانی هەولێر و دهۆکیش ئەمڕۆ دەستیپێکرد.

لێدوانی فەرمی: سەرچاوەیەک لە وەزارەتی دارایی کوردستان بە ئاڤای وت،  ئەمڕۆ دەست بە دابەشکردنی شەش مووچە بنەڕەتییەکە کرا، ئەوانەی 180 ڕۆژ مۆڵەتی کۆکراوەیان هەیە، زیاتر لە 20 هەزار خانەنشین دەگرێتەوە و ئیکرامییەکە لە 8 خەزێنە دابین دەکرێت و لەوێوە پارە بۆ بانکەکان دەنێردرێت.

زانیاریی زیاتر: حکومەتی کوردستان لەسەر داهاتی ناوخۆ 57 ملیار و 287 ملیۆن دیناری بۆ ئیکرامییەی خانەنشینان تەرخان کردووە، هەر شەش مووچەکە بەیەکەوە وەردەگرن. پرۆسەکە قۆناغ بە قۆناغە، ئەمڕۆ بەشێکیان وەریان گرتووە و ئەوانی تریش لە ڕۆژانی داهاتوودا وەری دەگرن.