سێ وڵاتی دیكە نوێنەرایەتی لە هەرێمی كوردستان دەكەنەوە

ئاڤا نیوز  

سێ وڵاتی دیكەی جیهان لە هەوڵی كردنەوەی نوێنەرایەتین لە هەرێمی كوردستان و دەستیان بە كاروبارەكان كردووە.

بۆچی گرنگە: كردنەوەی نوێنەرایەتیی هەر وڵاتێك لە هەرێمی كوردستان، سەرەڕای ئەوەی دەبێتە هۆی پتەوتربوونی پەیوەندیی نێوان هەرێمی كوردستان و ئەو وڵاتە، لە ڕووی ئاڵوگۆڕی بازرگانییشەوە سوودی زۆری بۆ هەردوولا دەبێت.

لێدوانی فەرمی: ئامانج هەركی، پەرلەمانتاری فراكسیۆنی پارتی، لە ئەنجوومەنی نوێنەرانی عێراق بە ئاڤا نیوزی گوت: ئێستا هەرسێ وڵاتی ئازەربایجان، فلیپین و بەنگلادیش سەرقاڵی جێبەجێكردنی ڕێككارەكانی كردنەوەی نوێنەرایەتین لە هەرێمی كوردستان و زۆرینەی كاروبارەكانیان كردووە.

زانیاریی زیاتر: رێككارەكانی كردنەوەی نوێنەرایەتیی هەر وڵاتێك لە هەرێمی كوردستان، دەبێت سەرەتا لە وەزارەتی دەرەوەی عێراقەوە دەستپێبكات و دواتر جگە لە باڵیۆزخانەی وڵاتەكە، مۆڵەت و فەرمانی هەردوو سەرۆكوەزیرانی هەرێمی كوردستان و عێراقیشی پێویستە.

باكگراوند: بەپێی ماڵپەڕی فەرمانگەی پەیوەندییەكانی دەرەوەی حكومەتی هەرێمی كوردستان، ئێستا 41 كونسوڵگەری و نووسینگە و ئاژانسی جیهان لە هەرێمی كوردستان هەن.