ئەمریكا پاڵپشتیی خۆی بۆ حكومەتی هەرێمی كوردستان دووپات دەكاتەوە

ئاڤا نیوز  

كۆنسوڵی گشتیی ئەمریكا لە هەرێمی كوردستان، پشتیوانیی وڵاتەكەی بۆ حكومەتی هەرێمی كوردستان دووپات دەكاتەوە.

وێنە گەورەكە: پەیوەندیی نێوان هەرێمی كوردستان و ئەمریكا، دوای ڕووخانی ڕژێمی بەعس زیاتر پەرەی سەندووە و ئێستا كۆنسوڵگەریی وڵاتەكە لە شاری هەولێر ڕۆڵی سەرەكیی لە پەرەپێدانی زیاتر پەیوەندییەكە دەبینێت.

ڕاگەیێنراوی فەرمی: بەپێی ڕاگەیێنراوێكی سەرۆكایەتیی دیوانی ئەنجوومەنی وەزیرانی هەرێمی كوردستان، ئومێد سەباح، سەرۆكی دیوانەكە پێشوازیی لە مارك سترۆ، كۆنسوڵی گشتیی ئەمریكا لە هەولێر و شاندێكی یاوەری كردووە.

بابەتی ستراتیژی: كۆنسوڵی ئەمریكا لە هەولێر، لە دیدارەكەدا پاڵپشتیی وڵاتەكەی بۆ حكومەتی هەرێمی كوردستان دووپات كردووەتەوە و ڕایگەیاندووە "بەردەوامبوونی گفتوگۆ بۆ چارەسەركردنی كێشەكانی نێوان هەولێر و بەغدا، پێویستە و دەبێت رێگەی دەستوور بگیرێتە بەر".