هێشتا ڕووفاتی زیاتر لە 200 كوردی ئێزدی لە بەغدا ماون

ئاڤا نیوز

 

ماوەیەکی درێژە زیاتر لە 200 ڕووفاتی کوردانی ئێزدی لە بەغدا ماون و ناسنامەیان ئاشکرا نەکراوە، حکومەتی عێراقیش بە کەمتەرخەم دادەنرێت لەو بارەیەوە.

وێنە گەورەکە: ساڵی 2014 چەکدارانی داعش هێرشیان کردە سەر قەزای شنگال و هەزاران هاونیشتمانی ئێزدی کوژران و خرانە نێو گۆڕی بەکۆمەڵەوە، بەڵام تاوەکو ئێستا هەموو گۆڕەکان هەڵنەدراونەتەوە.

لێدوانی فەرمی: عەقید شاکر مەحموود، ئەفسەری دەستەی لێکۆڵینەوە و کۆکردنەوەی بەڵگەنامە لە دهۆک بە ئاڤا نیوز ڕاگەیاند: ماوەی زیاتر لە سێ ساڵە ئەو ڕووفاتانە بۆ بەغدا نێردراون، بەڵام تاوەکو ئێستا حکومەتی عێراق کاری لەسەر ئاشکراکردنی ناسنامەیان نەکردووە.

هۆکارە زانراوەکان: پزیشکی دادی بەغدا ڕایگەیاندووە، توانای دارایی ئەوەیان نییە پشکنینەکان بکەن کە وەرگرتنی نموونەی خوێن و DNA یە و پارەیەکی زۆری پێویستە.

چارەسەرەکان: پێویستە نموونەی خوێنی کەسوکاری قوربانیان لە بەغدا وەربگیرێت و فشار لە لایەنە پەیوەندیدارەکان بکرێت بۆ ئەوەی دەست بە کارەکانی ئاشکراکردنی ناسنامەی ئەو ڕووفاتانە بکرێت.

 

ژمارەکان وادەڵێن: نزیکەی 500 ڕووفات بۆ بەغدا نێردراون و 175 لەوان ناسنامەیان ئاشکراکراوە و زیاتر لە 200 ڕووفات ماون.