بەهۆی سكاڵای پارتی وەرگرتنی پۆستەكانی یەكێتی لە نەینەوا ڕاگیراوە

ئاڤا نیوز

20 ڕۆژ بەسەر دابەشکردنی پۆستەکانی حکومەتی خۆجێیی نەینەوا تێپەڕیوە، تاوەکو ئێستا هیچ كەسێك لەوانەی پۆستیان بەرکەوتووە دەستبەکار نەبوون.

وێنە گەورەکە: یەكێتیی وەک بەشێک لە هاوپەیمانی نەینەوا موستەقبەل وەرگرتنی دوو قایقام، دوو بەڕێوەبەری گشتیی و دوو بەڕێوەبەری ناحیە بەرکەوتەیەتی، داوای قایمقامی مەخموور و بەڕێوەبەری ناحییەکانی وانکێ و سنوونێی کردووە، پارتیش ئامادەنییە دەستبەرداریان بێت و لە دادگەی فیدڕاڵی سکاڵای کردووە.

لێدوانی فەرمی: غەیاس سوورچی، بەرپرسی ڕاگەیاندنی مەڵبەندی یەکێتی لە موسڵ بە ئاڤا نیوزی گوت: "بەهۆی ئەو سکاڵایەی لە دادگەی فیدڕاڵی کراوە دەستبەکاربوون وەستاوە، بەڵام بڕیاری دادگە کارناکاتە سەر بەرکەوتەی ئێمە و دوو قایمقام و دوو بەڕێوەبەری ناحیە مافمانە".

ئەوەی پێویستە بیزانیت: بەگوێرەی پەیڕەوی نێوخۆ، دوای دابەشکردنی پۆستەکان بۆ ماوەی 15 پڕۆژ دەستبەکاربوون دەوەستێت، بۆ ئەوەی هەر لایەنێک تانەی هەبێت پێشکەشی بکات. 

باکگراوند: ئەنجوومەنی پارێزگای نەینەوا ڕۆژی 02-07-2024 سەرۆكی یەكە ئیدارییەكانی هەڵبژارد، بەپێی نووسراوێكی فەرمیی سه‌رۆكایه‌تیی ئه‌نجوومه‌نی وه‌زیرانی عێراق - ده‌سته‌ی باڵای رێكخستنی پارێزگاكان داوای ڕاگرتنی گۆڕانکارییەكانی کرد.