سوودانی: نابێت هیچ پێکهاتەیەکی کەرکووک پەراوێز بخرێت

ئاڤا نیوز

سەرۆکوەزیرانی عێراق لە بەغدا پێشوازی لە فراکسیۆنە عەرەبییەکانی ئەنجوومەنی پارێزگای کەرکووک دەکات و جەخت لە گرنگی هەنگاوەکانی پێکهێنانی حکومەتی خۆجێیی بە بەشداری سەرجەم پێکهاتەکان دەکاتەوە.

بۆچی گرنگە: ئەو 30 ڕۆژەی وەك مۆڵەت بە لایەنە براوەكانی ئەنجوومەنی پارێزگای كەركووك دراوە بۆ ئەوەی لەسەر دانانی كەسێك بۆ پۆستی پارێزگار بگەنە ڕێككەوتن، نیوەی وادەکە خەریكە تێدەپەڕێت، بێ ئەوەی بگەنە هیچ ڕێككەوتنێک، هەرچەندە باس لە هەبوونی دوو  سیناریۆ دەکرا.

وێنە گەورەکە: لە چوارچێوەی هەوڵەکانی بۆ گەیشتن بە ڕێککەوتن و پێکهێنانی حکومەتی خۆجێیی لە کەرکووک، ئەمڕۆ پێنجشەممە محەممەد شیاع سوودانی، سەرۆکوەزیرانی عێراق لە بەغدا پێشوازی لە ئەندامانی ئەنجوومەنی پارێزگای کەرکوک لە پێکهاتەی عەرەب کرد کە خاوەنی شەش کورسین.

ڕاگەیێنراوی فەرمی: سوودانی جەختی لە گرنگی تەواوکردنی ڕێکارەکانی پێکهێنانی حکومەتی خۆجێیی کردووەتەوە، بە کۆدەنگی لە نێوان نوێنەرانی پێکهاتەکانی پارێزگاکە و دڵنیابوون لە بەشداریکردنی کاریگەرانەی هەمووان و پەراوێزنەخستنی هیچ پێکهاتەیەک لە بڕیارداندا.

ئەوەی پێویستە بیزانیت: ئێوارەی ڕۆژی 11-7-2024، ئەنجوومەنی پارێزگای كەركووك یەكەم كۆبوونەوەی خۆی کرد، دواتر كۆبوونەوەكە هەڵگیرا و لایەنەكان ڕێككەوتن لە ماوەی 30 ڕۆژدا پۆستەكانی پارێزگاكە یەكلایی بكەنەوە.