لە حەوت ساڵدا لە کەرکووک 90 هەزار عەرەب نیشتەجێ کراون

ئاڤا نیوز

لە حەوت ساڵی ڕابردوودا 90 هەزار عەرەب هاوردەی کەرکووک کراون و نۆ گەڕەک و دەیان گوندی نوێیان دروست کردووە، لە 21 ساڵی ڕابردووشدا ژمارەی دانیشتووانی پارێزگاکە 50% زیادی کردووە.

وێنە گەورەکە: لە دوای ڕووداوەکانی 16ـی ئۆکتۆبەری ساڵی 2017 و بەهۆی دەسەڵاتی عەرەبەوە، هاتنی بە لێشاوی عەرەب ڕووی لە پارێزگای کەرکووک کرد، بەشێوەیەک ئێستا نۆ گەڕەک و دەیان گوندی عەرەبی تازە دروستکراون.
 

لێدوان فەرمی: فەهمی بورهان، سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان بە ئاڤا نیوزی ڕاگەیاند، "لە ماوەی حەوت ساڵی ڕابردوودا زیاتر لە 90 هەزار عەرەب هێنراونەتە کەرکووک و بەشێوەیەکی بەرچاو فۆڕمی خۆراک و نیشتەجێبوونیان بۆ دەرکراوە".

زانیاریی زیاتر: فەهمی بورهان باس لەوە دەکات بەپێی بەدواداچوونی ئەوان کە دەیان بەڵگەیان لایە، لەدوای دەستبەکاربوونی ڕاکان جبووری وەک پارێزگاری بەوەکالەت بە پلانی پێشوەختە ئەم کارانە کراون.

مەترسییە پێشبینیکراوەکان:  لە کەرکووک نۆ گەڕەکی تازە بۆ عەرەبەکانی هاوردە دروست کراون، ئەمەش مەترسی گۆڕینی دیمۆگرافیا لە شارەکە دروست دەکات، مەترسییەکە بە جۆرێکە ئەگەر سنوورێک بۆ عەرەب دانەنرێت، لە چەند ساڵی داهاتوودا ژمارەی عەرەبەکانی کەرکووک زۆر زیاتر دەبێت.


ژمارەکان وادەڵێن: بەپێی ئەو داتایانەی بە ئاڤا نیوز  دراون، لەدوای ڕووخانی ڕژێمی بەعس ژمارەی دانیشتووانی کەرکووک لە 50٪ زیادی کردووە، لە  700 هەزار کەسەوە ژمارەکە بۆ نزیکەی ملیۆنێک و 500 هەزار کەس زیادی کردووە، بەشی زۆری زیادبوونەکەش لەنێو نەتەوەی عەرەبە.