لایەنە کوردییەکانی ڕۆژئاوای کوردستان بۆ ئاڤا نیوز: ئامادەی دانوستانین

ئاڤا نیوز

 

لایەنە کوردییەکانی ڕۆژئاوای کوردستان ئامادەن بۆ دانوستانی نێوانیان و داواش دەکەن ئاستەنگ بۆ ئەو هەوڵانە دروست نەکرێت و دووبارە دەست بە دانوستانەکان بکرێتەوە.

 

وێنە گەورەکە: گفتوگۆکانی نێوان لایەنە کوردییەکانى ڕۆژئاوای کوردستان بە چەند قۆناغێک بەڕێوەچوون و دوایین جاریش لە ساڵی 2020 بوو، کە بەهۆی ناکۆکی لایەنەکان بەتەواوی وەستاوە و ئێستاش دووبارە هەوڵ بۆ دەستپێکردنەوەی دەدرێت.

 

بۆچی گرنگە: یەکدەنگی و لێکنزیکبوونەوەی لایەنە کوردییەکانی ڕۆژئاوای کوردستان هەنگاوێکە بۆ بەهێزبوون و سەرکەوتنی پڕۆسەی سیاسی و سەقامگیری، پاراستنی هاووڵاتیانی کورد لە ڕۆژئاوا لەبەرامبەر مەترسییەکان.

 

ئەوەی ئێستا ڕوودەدات: لە نوێترین لێدوانیدا مەزڵووم عەبدی، فەرماندەی گشتیی هەسەدە دەڵێت، ئەمریکا، بەریتانیا و فەرەنسا داوای دەستپێکردنەوەی گفتوگۆکانى نێوان لایەنە کوردییەکانی ڕۆژئاوای کوردستانیان کردووە و ئێمەش پێشوازی لەو داواکارییە دەکەین و بە گرنگی دەزانین.

 

لێدوانی فەرمی: بەرپرسانی حیزبە سیاسییەکانی ڕۆژئاوای کوردستان بۆ ئاڤا نیوز بەمشێوەیە باس لە دانوستانەکانی لایەنە کوردییەکان دەکەن:

 

ساڵح موسلیم، هاوسەرۆکی پارتی یەکێتیی دیموکراتی سووریا: "لەلای ئێمەوە هەوڵدان هەیە و وەک پەیەدە دەمانەوێت ئەو کۆبوونەوە و دانوستانانە لەنێوان لایەنە کوردییەکاندا دەستپێبکرێنەوە".

 

بەشار ئەمین، ئەندامی مەکتەبی سیاسیی پارتی دیموکراتی کوردستان – سووریا:
"لە ڕابردوودا و ئێستاش ئێمە بەردەوام ئامادەبووین بۆ دانوستانی لایەنە کوردییەکان، بەڵام ڕێگری بۆ بەرەوپێشچوونی دانوستانەکان دروست کراوە".

 

ئەحمەد سلێمان، جێگری سکرتێری پارتی دیموکراتی پێشڤەڕووی کورد لە سووریا: "ئێمە دانوستانی کوردی – کوردی زۆر بە گرنگ دەبینین، بەڵام ناکرێت دوولایەن بێت، بەڵکو دەبێت هەموو پارتەکان بەشدارییان پێ بکرێت، ئەمە لە بەرژەوەندیی کوردە لە ڕۆژئاوای کوردستان، ئێستاش ئێمە بۆ هاوکاری و بەشداری و سەرکەوتنی پرۆسەکە ئامادەین و ئامانجمان یەکبوونی کوردە".

 

جەدعان عەلی، سەرۆکی دەستەی نوێنەرایەتی ئەنجوومەنی نیشتمانیی کورد لە سووریا لە هەرێمی کوردستان: "هیچ هەنگاوێکی کردەیی بۆ بەڕێوەچوونی دانوستانەکان نییە، ئێمە بەردەوام ئامادەین بۆ دانوستان، ئێمە هیوادارین بەرپرسانی پەیەدە زەمینەسازیی بکەن لە ئازادکردنی هاوڕێیەکانمان  و هەنگاو بۆ دانوستان بنێن، تاوەکو ئێستاش هیچ پەیوەندییەک و دانیشتنێکیان لەگەڵ ئێـمە نەبووە".