هه‌ڵپه‌ڕكێی كوردی تەمەنی 6000 ساڵه‌

ئاڤا دیجیتاڵ

 

ژمارەیەک پاشماوەی دێرینی گڵینەو گۆزە لە ناوچە جیاوازەکانی کوردستان دۆزراونەتەوە، کە دیمه‌نی سه‌ما و هه‌ڵپه‌ڕكێیان له‌سه‌ر نەخشێنراوە، کە هاوشێوەی هەمان ئەو هەڵپەڕکێیەیە کە ئێستا باوە. مێژووی ئەو پاشماوە دێرینانە دەگەڕێنەوە بۆ 6000 ساڵ لەمەوبەر، بەوپێیەش بێت ئەم شێوازی هەڵپەڕکێیەی ئێستا هەیە لە پێش 6000 هەزار ساڵ لەمەوبەرەوە لەنێو خەڵکی دێرینی ئەم ناوچەیەدا هەبووە.

 

وێنە گەورەکە: خەڵکی كوردستان له‌كاتی ده‌ربڕینی خۆشی و ئاهه‌نگ و شادییه‌كانیاندا به‌ڕیزێک کە دەستی یەکیان گرتووە سەما دەکەن. کەسی سه‌ره‌تای ڕیزه‌كه‌ به‌ سه‌رچۆپی ناوده‌برێت و کەسی كۆتایی ڕیزه‌كه‌ش به‌ گاوانی ناوده‌برێت. ئەم شێوازی هەڵپەڕکێیە هاوشێوەی ئەو وێنە مێژووییانەیە کە لەسەر گڵینەو گۆزە شوێنەوارییەکان نەخشێنراوە. ئەمەش سەلمێنەری ئەو راستییەیە کە ئەو هەڵپەڕکێیەی ئێستا هەیە لە روخساردا هەمان ئەو هەڵپەڕکێ و سەمایەیە کە هەزاران ساڵ لەمەوبەر خەڵکی نیشتەجێی ئەم ناوچانە پەیڕەویان لێکردووە.

 

لێدوانی فەرمی: بڕیار ئه‌كبه‌رسان شوێنه‌وارناس بۆ ئاڤا نیوزی ڕوونكرده‌وه، له ‌هه‌ڵكۆڵینه شوێنه‌وارییه‌كانی گردی موسیان له‌ باشوور و خۆرهه‌ڵاتی كوردستان له‌ پارێزگای ئیلام چەند ‌پارچه‌ گڵێنه‌یه‌ك دۆزراونە‌ته‌وه‌ له‌ سه‌ر گڵێنه‌كه‌ دیمه‌نێك ده‌رده‌كه‌وێت لە بەشی خوارەوەیدا شێوەی چەند دەهۆڵێک دروستکراون، لە بەشی سەرەوەی کۆمەڵێک سەماکەر دەبینین سه‌ماكه‌یان هاوشێوه‌ی سەمای ئێستای كوردییه‌، هه‌روه‌ها پارچە گـۆزەیــەک لە هەزارەی چوارەمی پێش زایین، لە گرده‌ سه‌وز "تەپە سەبز" كه‌ تەپۆڵکەی پێش مێژوویی ناوچه‌ی لۆڕستانە ‌دۆزراوه‌ته‌وه‌، بەراورد دەکرێت بە هەمان سەما و هەمان جل و بەرگ کە كورده‌كان ئێستا به‌كاری ده‌هێنن.

 

بۆچی گرنگه: سەما و هه‌ڵپه‌ڕکێ  به‌شێوه‌ی ڕیزبەستن له‌ به‌شێك له‌كلتوره‌ جیاوازه‌كانی خەڵکی ڕۆژهه‌لاتی ناوه‌ڕاست ده‌بینرێت، به‌ڵام ئه‌م گڵینانه‌ کە له‌ خاکی كوردستان دۆزراونه‌ته‌وه‌، سەلمێنه‌ری ئه‌وه‌ن باپیرانی کۆنی كورد، کە هەزاران ساڵە لەم ناوچەیە نیشتەجێن، داهێنه‌ری ئه‌م شێوازی سەماکردن و هەڵپەڕکێیەن و لێره‌وه‌ به‌ ناوچەکەدا بڵاوبوه‌ته‌وه‌.