پارتی لە کەرکووک داوا دەکات بەخێرایی تەقەکارانی لقی سێ ئاشکرا بکرێن

ئاڤا نیوز

بەرپرسی مەکتەبی ڕێکخستنی کەرکووک ــ گەرمیانی پارتی داوا دەکات بەخێرایی لێکۆڵینەوە لە ڕووداوی تەقەکردن لە لقی سێ بکرێت و زوو بکەران ئاشکرا بکرێن.

 

وێنە گەورەکە: کاتژمێر 01:50 خولەکی بەرەبەیانی ئەمڕۆ شەممە، لە گەڕەکی ئەحمەد ئاغا لە شاری کەرکووک لە دوو ئاراستە تەقە لە بارەگای لقی سێی پارتی دیموکراتی کوردستان کرا.

 

پەیامی فەرمی: هیوا ئەحمەد، بەرپرسی مەکتەبی ڕێکخستنی کەرکووک ــ گەرمیانی پارتی، لە پێگەی فەرمی خۆی نووسیویەتی: "ئەوەی ڕووی داوە کارێکی ترسنۆکانە بوو، بۆ شێواندنی باری ئاسایشی کەرکووک و هەندێ مەرامی دیکە بوو و تێیدا پارتی بەئامانج گیراوە."

زانیاریی زیاتر: هیوا ئەحمەد بە ئاماژەکردن بەوەی پاسەوانەکانی بارەگای لق لە ئاسایش و پێشمەرگە دەمودەست بەرپەرچی تەقەکەرەکانیان داوەتەوە و "نەیانهێشتووە ناحەزان لە مەرامەکەیان سەرکەوتوو بن"، داوا دەکات دامودەزگا پەیوەندیدارە ئەمنییەکان زوو بکەران  ئاشکرا بکەن و لە ئەنجام ئاگاداریان بکەنەوە.