حکومەتی عێراق دان بە زانکۆی ئاکرێ دا دەنێت

ئاڤا نیوز

بە مەبەستی هەڵسەنگاندن و دواتریش داننان بە زانکۆی ئاکرێ، شاندێکی وەزارەتی خوێندنی باڵای عێراق لە ئاکرێیە.

وێنە گەورەکە: ڕۆژی 19-06-2023، سەرۆکوەزیران بارزانی، ڕەزامەندی دەربڕی لەسەر کردنەوەی دوو زانکۆی نوێ لە هەرێمی کوردستان کە یەکێکیان لە ئاکرێ بوو، ڕۆژی 11-07-2023، بە فەرمی زانکۆکە کرایەوە.

لێدوانی فەرمی: د. مەنهەل ئیلهام، سەرۆکی زانکۆی ئاکرێ بۆ زانستە کردارییەکان بە ئاڤا نیوزی ڕاگەیاند: ئەوان لەگەڵ لیژنە تایبەتییەکەی وەزارەتی خوێندنی باڵا و لێکۆڵینەوەی زانستی لە حکومەتی عێراق بە وردی باسی زانکۆی ئاکرێ و هەنگاو و قۆناغەکانی ئایندەی زانکۆکەیان کردووە.

زانیاریی زیاتر: سەرجەم داتا و زانیاریی وەک ژمارەی کۆلێژ و پەیمانگە و ژمارەی مامۆستایانی هەڵگری بلۆمی باڵا و ماستەر و دکتۆرا و ستافی زانستی و ژمارەی فەرمانبەران و قوتابیان، پلانەکانی ئایندە بۆ شاندەکە خراونەتەڕوو. 

ئەوەی پێویستە بیزانیت: شاندەکەی عێراق لە حەوت کەس پێکهاتووە و بۆ ماوەی چوار ڕۆژ لە ئاکرێ دەبێت، گەڕانی مەیدانی و هەڵسەنگاندنی تەواوەتی بۆ زانکۆکە بە سەرجەم بەشەکانییەوە دەکەن و ئامانج لێی داننانە بە زانکۆکە.