سەرۆکی دەستەی گەشتوگوزار داوایەک لە شوێنە گەشتیارییەکان دەکات

ئاڤا نیوز  

سەرۆکی دەستەی گەشتوگوزار داوا لە بنکە گەشتیارییەکان دەکات، میوزیک و گۆرانی کوردی پەخش بکەن و تابلۆی هونەرمەندانی کوردستان بەکاربهێنن.

وێنە گەورەکە: گەشتوگوزار بۆ هەرێمی کوردستان سەرەڕای بایەخە ئابوورییەکەی، هاوکات ڕەهەندێکی نیشتمانیشی هەیە و ئامرازێکی بەهێزە بۆ ئاشناکردنی گەشتیاران بە مێژوو، شوناس، فەرهەنگ و کولتووری کوردستان. 

لێدوانی فەرمی: ئەمەل جەلال، سەرۆکی دەستەی گەشتوگوزار ڕایگەیاند: داوا لە سەرجەم بنکە گەشتیارییەکان (چێشتخانە، هۆتێل، مۆتێل…هتد) دەکەم کە بە ئەرکی نیشتمانی خۆیان هەڵبستن و ببن بە بەشێک لە پاراستنی فەرهەنگی وڵاتەکەمان لە ڕێگەی زیاتر پشت بەستن بە میوزیک و گۆرانی کوردی و بەکارهێنانی تابلۆی هونەرمەندانی کوردستان.

زانیاریی زیاتر: دوای بەدواداچوون بۆمان دەرکەوتووە زۆرینەی بنکە گەشتیارییەکانی هەرێمی کوردستان زیاتر میوزیکی بیانی پەخش دەکەن و دیوارەکانیان بە تابلۆی هونەرمەندانی بیانی و وێنەی وڵاتانی تر رازاندووەتەوە، ئەمەش یەکناگرێتەوە لەگەڵ ئامانجی ستراتیژیمان کە پاراستنی شوناس و فەرهەنگی نەتەوەییمانە.