ئەو "بۆمب"ـەی هەنیيەی پێ کوژرا بە قاچاخ براوەتە ئێران

ئاڤا نیوز

ئەو بۆمبەی ئیسماعیل هەنییە، سەرۆکی مەکتەبی سیاسیی حەماسی پێ کراوەتە ئامانج، دوو مانگ پێشتر بە قاچاخ براوەتە ناو ئێران و لە تاران جێگیر کراوە.

وێنە گەورەکە: بە گوێرەی ڕاپۆرتێکی نیویۆرک تایمزی ئەمریکی، ئیسماعیل هەنییە بە بۆمب کراوەتە ئامانج نەک بە مووشەک، وەک ئەوەی زۆربەی میدیاکان بڵاویان کردووەتەوە. بۆمبەکە لە جۆرێکی پێشکەوتووە و لە ڕێگەی دوورەوە کۆنترۆڵ دەکرێت، نزیکەی دوو مانگ پێشتر براوەتە ئەو خانووەی هەنییەی تێدا ماوەتەوە.

ئەوەی پێویستە بیزانیت: هەرچەندە ئیسرائیل بە فەرمی بەرپرسیارێتیی کوشتنی هەنییەی لە ئەستۆ نەگرتووە، بەڵام بە گوێرەی سەرچاوەکان ڕاستەخۆ دوای ڕووداوەکە ئیسرائیل وردەکارییەکانی بە بەرپرسانی ئەمریکا و چەند وڵاتێکی ڕۆژئاوایی داوە. 

زانیاریی بەدەستهاتوو: چەند بەرپرسێکی ئێرانی گوتویانە ئەو بۆمبەی هەنییەی پێ کوژراوە، هاوشێوەی ئەوە بووە کە ساڵی 2020 مۆساد لە کوشتنی موحسین فەخریزادە، زانای ئەتۆمیی ئێران، بەکاری هێناوە.