ئاڤای خەڵک؛ ژمارەیەک هاووڵاتی لە سلێمانی کێشەی تۆمارکردنی سیستەمی سۆلاریان هەیە

ئاڤا نیوز

لە سلێمانی دەیان هاووڵاتی کە سیستەمی کارەبای سۆلاریان هەیە و دەبێت مانگانە بەپێی ئەو بڕە زیادەیەی کارەبا کە لە سیستەمەکە دەستیان دەکەوێت و دەگەڕێتەوە بۆ ناو تۆڕی نیشتمانی کارەبا، داشکاندن لە کرێی کارەبایان بۆ بکرێت بەڵام گرفتیان تووش بووە و دەڵێن ئەو پارەیەمان بۆ ناگەڕێتەوە.

زانیاریی بەدەستهاتوو: ژمارەیەک هاووڵاتی دەڵێن لە مانگی پێنجەوە مامەڵەی تۆمارکردنمان کردووە، بەڵام تاوەکو ئێستا ئەو پارەیەمان بۆ نەگەڕاوەتەوە، چەند جارێکیش سەردانی بەڕێوەبەرایەتی کارەبای سلێمانیمان کردووە و هەر جارە و بیانوویەکمان بۆ دەهێننەوە و کێشەکەمان چارەسەر نەبووە.

لێدوانی فەرمی: ئومێد ئەحمەد، وتەبێژی وەزارەتی کارەبا بە ئاڤای ڕاگەیاند، لە بنەمادا مامەڵەکانی ئەو هاووڵاتییانە بە ڕێگەیەکی هەڵە کراوە، ئەوانەی ئەو کێشەیەیان هەیە لە بەڕێوەبەرایەتی دابەشکردنی کارەبا مامەڵەکانیان کردووە، ڕێگە ڕاستەکە ئەوەیە دەبێت ئەو هاونیشتمانیانە سەردانی بەڕێوەبەرایەتیی گشتیی کارەبای سلێمانی بکەن و پێیان بڵێن کە سیستەمی سۆلاریان داناوە و چالاک نەبووە، لەوێ فۆرمێک پڕدەکەنەوە، دواتر ئەو فۆرمە ئاراستەی بەڕێوەبەرایەتیی کارەبای ڕۆژئاوا دەکرێت، لەوێشەوە ئاراستەی بەشی فرۆشتنی وزەی دەکەن، بەم جۆرە سیستمەکە تۆمار دەکرێت.