ئاڤای خەڵک؛ دانیشتووانی گەڕەکی بەهاری نوێ لە بەحرکە داوای خزمەتگوزاری دەکەن

ئاڤا نیوز

دانیشتووانی گەڕەکی بەهاری نوێ لە بەحرکە دەڵێن بەتەواوی گەڕەکەکەمان پشتگوێ خراوە و کێشەیەکی زۆری نەبوونی خزمەتگوزارییە سەرەتاییەکانمان هەیە، هەموو کۆڵان و گەڕەکەکانی چواردەورمان قیرتاو کرا و کۆڵانەکانیان چاککرا بەس ئەوەی ئێمە بەجێماوە.

زانیاریی بەدەستهاتوو: مام ساڵح، دانیشتوویەکی گەڕەکەکەیە دەڵێت، لەکاتی باران بارین ڕێگامان لێ دەگیرێت، چەند جارێک منداڵەکانمان کەوتوونەتە ناو مەنهۆڵەکانەوە، زبڵ و خاشاکێکی زۆریش کۆبووەتەوە.

مەمووند عەبدلوەهاب، سەرۆکی شارەوانی بەحرکە بە ئاڤای وت، ئاگاداری کێشەکەین، بەڵام بەهۆی نەبوونی بودجەی پێویست نەمانتوانیوە خزمەتگوزارییەکانیان پێ بگەیێنێن. نووسراومان بۆ سەرووی خۆمان کردووە، لە ماوەیەکی نزیکدا هەموو کێشەکانیان چارەسەر دەکەین.