کۆمیسیۆن: 400 تانە لەسەر ئەنجامی کۆتایی هەڵبژاردن تۆمار کراون

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق ڕایگەیاند، تەنیا سێ کاتژمێر وەک ماوەی تانەدان لەسەر ئەنجامی کۆتایی هەڵبژاردنی پەرلەمانی عێراق ماوە، تا ئێستا 400 تانە لەسەر ئەنجامی کۆتایی هەڵبژاردنەکە تۆمارکراون.

چیرۆکی سەرەکی: ڕۆژی دووشەممەی ڕابردوو کۆمیسیۆنی هەڵبژاردنەکان ئەنجامی کۆتایی هەڵبژاردنی خولی شەشەمی پەرلەمانی عێراق ڕاگەیاند، ڕۆژانی سێشەممە، چوارشەممە و ئەمڕۆ پێنجشەممەش دەرفەت بە کاندید و لایەنەکان دراوە کە ئەگەر گومانیان لە ئەنجامەکان هەبێت تانە تۆمار بکەن، دواتریش لە حەوت ڕۆژدا کۆمیسیۆن وەڵامی تانەکان دەداتەوە.

لێدوانی فەرمی: جومانە غەڵای، وتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤای ڕاگەیاند، تا پێش کاتژمێر 12:00ـی نیوەڕۆی ئەمڕۆ پێنجشەممە 400 تانە لەلایەن کاندید و لایەنەکان لەسەر ئەنجامی کۆتایی هەڵبژاردنی پەرلەمانی عێراق تۆمارکراون.

زانیاریی زیاتر: وتەبێژی کۆمیسیۆنی باڵای سەربەخۆی هەڵبژاردنەکانی عێراق وتیشی، کاتژمێر 3:00ـی دوای نیوەڕۆی ئەمڕۆ پێنجشەممە کۆتا وادەیە بۆ تۆمارکردنی تانەکان و لەو کاتە بەدواوەوە چیتر تانە لەسەر ئەنجامی کۆتایی هەڵبژاردن وەرناگرن.