چەند دکتۆرێکی زانکۆ لەبارەی دروستبوونی لافاو بە ئەنجامی نوێ گەیشتوون

ئاڤا نیوز  

چەند دکتۆرێکی زانکۆی سەڵاحەدین توێژینەوەیەکیان لەبارەی دیاریکردنی ئەو شوێنانەی لە شاری هەولێر لە وەرزی زستان لافاوی لێ دروست دەبێت ئەنجامداوە، بە چەند دەرئەنجامێکی نوێ گەیشتوون.

وێنە گەورەکە: ساڵانە لە وەرزی زستان لە چەند ناوچە و شارێکی هەرێمی کوردستان دیاردەی پەنگخواردنەوەی ئاو لە شەقامەکان و هەندێجار لافاو دووبارە دەبێتەوە.

لێدوانی فەرمی: د.ڕێبەر تەحسین مامۆستای زانکۆ و پسپۆڕ لە جیۆلۆجیای ژینگەیی بە ئاڤا نیوزی گوت: بە هاوکاری دوو دکتۆری دیکەی هاوپیشەم لەڕێگەی بەکارهێنانی مانگی دەستکرد و سیستەمی زانیاریی جوگرافی GIS لە شەقامی 150 مەتری هەولێر لەڕێگەی وەرگرتنی 12  (پارامیتەر) جۆری دەستنیشانکردن، داتای ورد کۆکراوەتەوە.

زانیاریی زیاتر: بەگوتەی ئەو مامۆستایەی زانکۆ دەرکەوتووە لە ٪45ی شاری هەولێر خاڵی لاوازی هەیە بۆ دیاردەی پەنگخواردنەوەی ئاو و دروستبوونی لافاو.

ئەوەی پێویستە بیزانیت: ئەو دکتۆرەی زانکۆ دەڵێت:" ساڵانی پێشوو بەهەمان میکانیزم لێکۆڵینەوەمان لەسەر شاری دهۆک ئەنجامدا، زستانی ڕابردوو لە هەموو ئەو شوێنانە لافاو دروستبوو کە وەک خاڵی لاواز دەستنیشانکرابوون".