فەرماندەیەکی باڵا لە ڕێگەی ئاڤاوە دەنگۆی هاتنی سوپای ئەمریکا بۆ کەرکووک ڕەتدەکاتەوە

ئاڤا نیوز

 

دەنگۆی  هاتنی 60 سەربازی ئەمریکی و تیمێکی هونەریی بۆ ناو سەربازگەی کەی وەن لە کەرکووک ڕەتدەکرێتەوە.

 

وێنە گەورەکە: بەرەبەیانی ئەمڕۆ دەنگۆی هاتنی سوپای ئەمریکا بە هاوبەشی لەگەڵ دژەتیرۆری عێراق و هەرێمی کوردستان  بۆ ئەنجامدانی ئۆپراسیۆنێک دژی داعش بڵاوبوەوە،  بەڵام فەرماندەیەکی باڵا ئەو دەنگۆیانە ڕەتدەکاتەوە و دەڵێت: لە ئێستادا یەک سەربازی ئەمریکی لە نێو سەربازگەی کەی وەن نییە.

 

لێدوانی فەرمی: فەرماندەیەکی باڵا لە نێو سەربازگەی کەی وەن، بە ئاڤا نیوزی ڕاگەیاند، "ئەو دەنگۆیانە ڕاست نین و تەنیا تیمێکی فەرەنسی کە بەردەوام جموجۆڵ و هاتووچۆیان هەیە، دەچنە کەی وەن و ئۆپەراسیۆن لە گەڵ دژە تیرۆری عێراق ئەنجام دەدەن لەوێ بوونیان هەیە، ئەوانیش تەنیا 20 سەربازن.

 

ئەوەی پێیویستە بیزانیت: ڕۆژی 29ـی ئاداری 2020 هێزەکانی ئەمریکا  لە چوارچێوەی هاوپەیمانی دژی داعش بەتەواوی لە سەربازگەی کەی وەن لە کەرکووک کشانەوە بنەکەکەیان ڕادەستی هێزەکانی دژەتیرۆر و پۆلیسی فیدراڵی و سوپای عێراقیان کرد.