سەرۆک بارزانی: پێویستە چارەسەرەکان بە ڕەچاوکردنی مافی سەرجەم پێکهاتەکانی کەرکووک بێت

کوردستان
2024-08-04

شەیری بکە لە:

وێنەی کۆبوونەوەکە

ئاڤا نیوز

سەرۆک مەسعود بارزانی و شاندی هاوبەشی كوتلەی عەرەبی و توركمانیی ئەنجوومەنی پارێزگای كەركووک جەختیان کردەوە کە پێویستە چارەسەرەكان بە ئاراستەی ڕەچاوكردنی مافی سەرجەم پێكهاتەكانی كەركووک بێت.

وێنە گەورەکە: ڕۆژی یەكشەممە 04-08-2024 لە سەڵاحەددین سەرۆک مەسعود بارزانی پێشوازی لە شاندێكی هاوبەشی كوتلەی عەرەبی و توركمانیی ئەنجوومەنی پارێزگای كەركووک و ژمارەیەک پەرلەمانتار و سەركردەی سیاسی بە سەرۆكایەتیی شێخ خەمیس خەنجەر كرد و بیروڕا لەبارەی بارودۆخی سیاسیی عێراق و دۆخی كەركووک و هەوڵەكان بۆ چارەسەركردنی پرسی پێكهێنانی حكوومەتی خۆجێی و هەڵبژاردنی پارێزگاری كەركووک و دیاریكردنی پۆستە ئیدارییەكانی دیکەی كەركووک ئاڵۆگۆڕ كرا.

ڕاگەیێنراوی فەرمی: لە دیدارەکەدا جەخت کرایەوە كە پێویستە چارەسەرەكان بە ئاراستەی ڕەچاوكردنی مافی سەرجەم پێكهاتەكانی كەركووک و لە خزمەت پاراستنی سەقامگیری و ئارامیی ئەو شارە و پێشكەشكردنی خزمەتگوزاری بە هاووڵاتیان و بووژانەوەی كەركووک بێت ئەویش لە چوارچێوەی تەوافق و كۆدەنگیی نیشتیمانی.

ئەوەی پێویستە بیزانیت: بڕیارە لە ماوەی 48 کاتژمێری داهاتوو، پۆستەکانی حکومەتی خۆجێیی کەرکووک یەکلایی بکرێنەوە، یەکێتی و بەشێک لە لایەنەکانی هاوپەیمانیی عەرەبی ڕێککەوتنیان کردووە پۆستە ئیدارییەکانی پارێزگاکە لەنێوان خۆیان دابەش بکەن، لەبەرامبەردا بەشەکەی دیکەی لایەنەکانی هاوپەیمانیی عەرەبی هەڕەشەی جوڵاندنی شەقامی عەرەبی دەکەن، لە ئەگەری لەدەستدانی پۆستی پارێزگار.