یەحیا ڕەسووڵ: لە ڕێگریکردن لە هێرشی سەر بنکە سەربازییەکان سەرکەوتوو بووین

ئاڤا نیوز 

 

گوتەبێژی فەرماندەیی گشتیی فەرماندەی هێزە چەکدارەکانی عێراق ڕایگەیاند، وەکو حکومەت تاڕادەیەکی زۆر سەرکەوتوو بوونە لە ڕێگریکردن لە هێرشی سەر بنکە سەربازییەکانی ئەمریکا لە عێراق.

 

وێنە گەورەکە: تاوەکو دێت دۆخی ناوچەکە بەهۆی ململانێ و گرژیی نێوان ئیسرائیل و گرووپە چەکدارەکانی سەر بە ئێران پەرەسەندنی زیاتر بەخۆیەوە دەبینێت، لە ڕابردوودا هەرکاتێک دۆخەکە ئاڵۆزی بەخۆیەوە بینیبێت بنکە سەربازییەکانی ئەمریکا لە عێراق و ناوچەکە کراونەتە ئامانجی ئەو گرووپانە.

 

لێدوانی فەرمی: لیوا یەحیا ڕەسووڵ، گوتەبێژی فەرماندەیی گشتیی هێزە چەکدارەکان بە ئاژانسی فەرمی عێراقی ڕاگەیاند: حکومەت تاڕاددەیەکی زۆر سەرکەوتوو بووە لە ڕاگرتن و ڕێگریکردن لە هێرشەکان بۆ سەر بنکە سەربازییەکانی عێراق کە ڕاوێژکارانی هێزەکانی هاوپەیمانیی نێودەوڵەتی جێگیرکراون.

 

زانیاریی زیاتر: بەگوتەی یەحیا ڕەسووڵ ئەوان کاتێک مامەڵە لەگەڵ ئەمریکا دەکەن، "ڕێککەوتنی ئەمنی سەربازیمان هەیە، هاوکات لیژنەکانی دانوستان سەبارەت بە بابەتی گواستنەوەی ئەرکی هاوپەیمانیی نێودەوڵەتی گەیشتوونەتە قۆناغی باش".