ئەمڕۆ 31 كارگە و پاڵاوگەی نایاسایی داخراون

ئاڤا نیوز

24 كاتژمێر مۆڵەت دراوەتە كارگە و پاڵاوگە نایاساییەكان بەڵێن نامەی داخستن پڕبكەنەوە، كوورەكانیان ساردبكەنەوە و بەتەواوی شوێنەكانیان چۆڵ بكەن لە سووتەمەنی و پاشماوەكان.

وێنە گەورەكە: بەمەبەستی پاككردنەوەی ژینگەی هەوای هەولێر لە بۆنی ناخۆش و دوكەڵی ڕەشی كارگە و پاڵاوگەكان، پارێزگاری هەولێر بڕیارێكی حەوت خاڵی ڕاگەیاند، یەكێك لە خاڵەكان داخستنی كارگە و پاڵاوگە نایاساییەكان بوو.

لێدوانی فەرمی: " لە سنووری قەزای قوشتەپە لیژنەكان بۆ داخستنی كارگە و پاڵاوگە نایاساییەكان دەسبەكاربوونە لە كۆی 36 كارگە و پاڵاوگەی نایاسایی كە مۆڵەتیان نییە ئەمڕۆ 20 یان داخران وتا هەموویان داداخرێن لیژنەكان بەردەوام دەبن" ئەمجەد سدیق، نوێنەری لیژنەی قائیمقامیەتی قەزای قوشتەپە ئەمەی بە ئاڤا نیوز گوت.

ئەوەی پێویستە بیزانیت: لە هەولێر 138 كارگە و پاڵاوگەی نایاسایی هەن، بە بڕیارێكی پارێزگاری هەولێر دەبێت سەرجەمیان دابخرێن، لیژنەیەكی تایبەت بۆ داخستنیان پێكهێنراوە.