زیاتر لە 500 ئاوارەی دیکە لە هەولێرەوە گەڕانەوە ناوچەکانیان

ئاڤا نیوز  

وەزارەتی کۆچ و کۆچبەرانی عێراق ڕایگەیاند، زیاتر لە 500 ئاوارە لە کەمپی خازر لە پارێزگای هەولێرەوە گەڕاونەتەوە ناوچەکانیان.

وێنە گەورەکە: دوای هاتنی چەکدارانی ڕێکخراوی داعش لە ساڵی 2014 دەیان هەزار کەس لە ناوچەکانی پارێزگای نەینەوا و پارێزگا سوونە نشینەکان ئاوارەی هەرێمی کوردستان بوون و لە کەمپەکان نیشتەجێ کران.

ڕاگەیێنراوی فەرمی: وەزارەتی کۆچ و کۆچبەرانی عێراق ڕایگەیاندووە: 518 ئاوارەی دیکە لە کەمپی خارز گەڕاونەتەوە ناوچەکانیان لە پارێزگای نەینەوا، ئەم پرۆسەیە بە هاوکاری ڕێکخراوی IOM ئەنجامدراوە.

ئەوەی پێویستە بیزانیت: بڕیار بوو 31-7-2024 دوا وادەبێت، بۆ داخستنی تەواوی کەمپەکان لەسەرانسەری عێراق، بەڵام ئەم پڕۆسەیە دواکەوتووەو ڕێبەر ئەحمەد وەزیری ناوخۆی حکومەتی هەرێمی کوردستان ڕایگەیاند، پرۆسەی گەڕاندنەوەی ئاوارەکان دواخراوە.

ژمارەکان وادەڵێن: تا ئێستا نزیکەی 26 هەزار و 500 خێزانی ئاوارە لە کەمپەکانی هەرێمی کوردستان ده‌ژین، 22 هەزاریان لە دهۆکن و چوار هەزار و 500ی دیكه‌شیان لە هەولێرن، هەر خێزانێک کە دەگەڕێتەوە چوار ملیۆن دیناری پێدەدرێت.