ئەنجوومەنی دەوڵەت: بەردەوامبوونی پارێزگاری بانکی ناوەندی لە پۆستەکەی نایاساییە

ئاڤا نیوز

 

ئەنجوومەنی دەوڵەت لە عێراق ڕایگەیاند، پارێزگاری بانکی ناوەندی بەهۆی ئەوەی گەیشتووەتە تەمەنی خانەنشینی، بۆیە لەئێستادا بەردەوامبوونی لە پۆستەکەی نایاساییە.

 

وێنە گەورەکە: عەلی عەلاق لە سەرەتای ساڵی 2023ەوە بەبڕیارێکی سەرۆکوەزیرانی عێراق وەک پارێزگاری بانکی ناوەندی بە وەکالەت دیاریکرا، ناوبراو لەلایەن بەشێک شارەزایانی ئابوری تۆمەتبار دەکرێت بە شکستهێنانی لە چارەسەرکردنی پرسی بەرزبوونەوەی بەهای دۆلار لە بەرامبەر دیناری عێراقی.

 

نووسراوی فەرمی: ئەنجوومەنی دەوڵەت کە دادگەیەکی کارگێڕییە و بۆچوونەکانی وەک بڕیار سەیر دەکرێن، لە وەڵامی پرسیارێکی سەرۆکی پەرلەمانی عێراقدا دەڵێت، عەلی عەلاق پارێزگاری بانکی ناوەندی بە وەکالەت گەیشتووەتە تەمەنی خانەنشینی کە 60 ساڵە و لەکاتی زۆر پێویستیشدا دەکرێت تا ماوەکەی 65 درێژبکرێتەوە، بەڵام پارێزگاری بانکی ناوەندی ئەوە ماوەیەشی تێپەڕاندووە.

 

زانیاريی زیاتر: "بەردەوام بوونی پارێزگاری بانکی ناوەندی بە وەکالەت لە پۆستەکەی پێچەوانەی یاسای خانەنشینی یەکگرتووە کە ئێستا لە عێراق بەرکارە".

 

لە لایەکی دیکەوە: بەهۆی نوسراوەکەی ئەنجوومەنی دەوڵەتەوە، دەنگۆیەک هەیە کە پارێزگاری بانکی ناوەندی داوای بەخشینی لە پۆستەکەی کردووە، بەڵام تائێستا بانکی ناوەندی و خودی عەلی عەلاق بە فەرمی دەنگۆکەیان پشتڕاستنەکردووەتەوە.