قۆناغی سێیه‌می گه‌ڕانه‌وه‌ی ئاواره‌كانی ده‌ڤه‌ری حه‌سه‌ن شام- خازر جێبه‌جێده‌كرێت

ئاڤا نیوز

 

لەسەر فەرمانی سەرۆكوەزیران بارزانی، قۆناغی سێیەمی گەڕانەوەی ئاوارەكانی دەڤەری حەسەن شام - خازر، جێبه‌جێ ده‌كرێت.

وێنە گەورەكە: بەهۆی هێرشی چەكدارانی داعشەوە سەدان خێزانی دەڤەری حەسەن شام - خازر، ئاوارەی هەرێمی كوردستان بوون و لە كەمپەكان دەژیان، پێشووتر دوو قۆناغی گەڕانەوەیان بۆ دەڤەرەكانی خۆیان جێبەجێ كراوە و بە فەرمانی سەرۆكوەزیران بارزانی قۆناغی سێیەمیش جێبەجێ دەكرێت.

ڕاگەیێنراوی فەرمی: وەزارەتی ناوخۆی حكومەتی هەرێمی كوردستان ڕایگەیاند:" له‌م قۆناغه‌دا‌ (266) خێزان کە (107)یان له‌ كه‌مپه‌كانی ئاوارەکان لە هه‌رێمی كوردستان و‌ (159)  له‌ ده‌ره‌وه‌ی كه‌مپه‌كان دەژین، به‌شێوه‌یه‌كی ئاره‌زوومه‌ندانه‌ ده‌گه‌ڕێنه‌وه‌ زێدی خۆیان لە گوندی حه‌سه‌ن شام‌".

زانیاریی زیاتر: دابینکردنی ئەمنیەت و خزمەتگوزاری زەمینە بۆ گەڕانەوەی زیاتری ئارەزوومەندانە خۆش دەکات. وەزارەتی ناوخۆی هەرێمی كوردستان وا دەڵێت.

چارەسەر: وەزارەتی ناوخۆ داوا لە دامه‌زراوه‌ فیدراڵییەكان ده‌كات هه‌نگاوی كرداری بۆ فه‌راهه‌مكردنی خزمه‌تگوزارییه‌ بنه‌ڕه‌تییه‌كان بۆ سنووره‌كه ده‌ستپێبكه‌ن،‌ تا ئەوانەی گەڕاونەتەوە ژیانێکی شەرەفمەندانە بژین و جارێکی دیکە ئاوارە نەبنەوە.