عێراق لەبری دەرەوەی وڵات دەیەوێت بەرکەوتووانی چەکی کیمیایی بباتە کەربەلا

ئاڤا نیوز

بە گوتەی سەرۆكی كۆمەڵەی قوربانیانی كیمیابارانی هەڵەبجە، چەند بەركەوتەیەكی چەكی كیمیایی لە هەڵەبجە، لەلایەن حكومەتی عێراقەوە لەبری ناردنیان بۆ دەرەوەی وڵات پێشنیازی ناردنیان بۆ كەربەلا بۆ کراوە.

وێنە گەورەكە: کیمیابارانی ھەڵەبجە لە 16ی ئازاری 1988 لەلایەن ڕژێمی بەعسی ڕوویدا، جگە لە شەهیدبوونی پێنج هەزار سڤیل، 10 هەزار  کەسی دیکەش بریندارکران.

لێدوانی فەرمی: لوقمان عەبدولقادر، سەرۆکی کۆمەڵەی قوربانیانی کیمیابارانی هەڵەبجە بە ئاڤا نیوزی گوت: "لیژنەیەک لە وەزارەتی تەندروستی عێراق 19 بەرکەوتووی چەکی کیمیایی دیاری کردبوو بۆ ئەوەی بە مەبەستی چارەسەری پزشکی ڕەوانەی دەرەوەی وەڵات بکرێن، کەچی دواتر بڕیاردرا ئەو بەرکەتووانە ڕەوانەی کەربەلا بکرێن ".

زانیاریی زیاتر:  "گوتیان دەیانبەنە كەربەلا لەوێ چارەسەریان بۆ بكرێت و گلێنەی چاویان بۆ بچێنرێت". لوقمان عەبدوڵڵا وای گوت.

ئەوەی پێویستە بیزانیت: لە هەرێمی کوردستان 808 بەرکەتووی چەکی کیمیایی هەیە، لەو ژمارەیە نزیکەی 25 کەس پێویستیان بە چاندنی چاو هەیە.

ئەمەش بزانە: لە ساڵی 2003ەوە تاوەکو ئێستا 127 بەرکەوتوو گیانیان لەدەستداوە و ساڵانە حەوت بۆ هەشت کەس گیانلەدەستدەدەن.