سوودانی: پێکهێنانی حکومەتی خۆجێیی کەرکووک زیاتر دوادەکەوێت

ئاڤا نیوز 

 

سەرۆکوەزیرانی عێراق ڕایگەیاند، بەرنامەی هەیە دوای پێکهێنانی حکومەتی خۆجێیی کەرکووک، سەردانی ئەو پارێزگایە بکات، بەڵام پێدەچێت پێکهێنانی ئیدارەی کەرکووک کاتی زیاتری بوێت.

 

وێنە گەورەکە: وەک یەکەم هەنگاو بۆ  پێکهێنانی ئیدارەی پارێزگاکە، بڕیار بوو ڕۆژی 1ـی ئەم مانگە ئەنجوومەنی پارێزگای کەرکووک کۆببێتەوە و پۆستی سەرۆکی ئەنجوومەنەکە یەکلا بکرێتەوە، بەڵام لەسەر داوای سەرۆکوەزیرانی عێراق کۆبوونەوەکە دواخرا.

 

لێدوانی فەرمی: محەممەد شیاع سوودانی، سەرۆکوەزیرانی عێراق لەمیانەی کردنەوەی وێستگەی دووبزی غاز کە بەشێوەی پەیوەندی ڤیدیۆیی بەشداری تێدا کرد، ئاماژەی بەوە کرد، کردنەوەی ئەو وێستگەیە کە توانای بەرهەمهێنانی 320 مێگاوات کارەبای هەیە، هەنگاوێکی گرنگە بۆ پەرەپێدانی کەرتی کارەبای پارێزگای کەرکووک.

 

زانیاریی زیاتر: "ویستمان سەردانی کەرکووک بکەین، بەڵام پێمانخۆش بوو جارێ چاوەڕێ بکەین تاوەکو حکومەتی خۆجێیی شارەکە پێکبهێنرێت، پێدەچێت ئەوەش کاتی بوێت". سەرۆکوەزیرانی عێراق وای گوت.