کوتلەی عەرەبی لە کەرکووک: پێویستە پۆستەکانی کەرکووک بە ڕێککەوتن دابەش بکرێن

ئاڤا نیوز

هەر شەش ئەندامەکەی کوتلەی عەرەبی لە کەرکووک ڕایانگەیاند، ئەگەر پێشوەخت ڕێککەوتن لەسەر پێکهێنانی حکومەتی خۆجێیی کەرکووک لەنێوان هەرسێ پێکهاتەکەدا نەکرێت، بەشداری کۆبوونەوەی ئەنجوومەنی پارێزگا ناکەن.

وێنە گەورەكە: سبەی ئەو وادەیەی بۆ دیاریكردنی پارێزگار و دابەشكردنی پۆستەكانی پارێزگای كەركووك دیاریكراوە كۆتایی دێت، بەڵام تائێستا پێکهاتەکان لەسەر دابەشکردنی پۆستەکان ڕێکنەکەوتوون.

ڕاگەیێنراوی فەرمی: هەر شەش ئەندامەکەی کوتلەی عەرەبی لە ئەنجوومەنی پارێزگای کەرکوک واژۆیان لەسەر ڕاگەیێنراوێکی هاوبەش کردووە و تێیدا ئاماژە بەوە دەکەن، بەگوێرەی ماددەی 13 لە یاسای هەڵبژاردنی ئەنجوومەنی پارێزگاکان، مەرجە هەموو لایەنەکان لە پێکهێنانی حکومەتی کەرکووکدا بەشداربن، بۆیە دەنگۆی کۆبوونەوەی ئەمشەوی ئەنجوومەن لە بەغداد تاکلایەنەیە و پێچەوانەی ئەو ماددە یاساییەیە، بۆیە بەشداری تێدا ناکەن.

زانیاری زیاتر: کوتلەی عەرەبی جەختدەکاتەوە:"ئێمە کۆدەنگین کە پێکەوە دانوستان بکەین و هەر ئەندامێکیشیمان پێچەوانەی ئەم ڕاگەیێنراوە کاربکات، بەڵێنەکەی پێشێل کردووە و بەرامبەر دەنگدەران و ئەو خوێنەی بۆ پاراستنی پێکهاتەی عەرەبی لە کەرکووک بەخشراوە، وەفادار نەبووە".