لیژنەیەکی باڵای ئەمنیی عێراق سەردانی تورکیا دەکات

ئاڤا نیوز

 

بۆ درێژەدان بە گفتوگۆ لەبارەی پرسە ئەمنی و سەربازییە هاوبەشەکانی نێوان هەردوو وڵات، لیژنەیەکی باڵای ئەمنیی عێراق سەردانی تورکیا دەکات.

 

وێنە گەورەکە: یەکشەممە 11-8-2024 بە سەرۆکایەیەتیی فوئاد حوسێن، جێگری سەرۆکوەزیران و وەزیری دەرەوەی عێراق و ڕێبەر ئەحمەد، وەزیری ناوخۆی هەرێمی کوردستان و قاسم ئەعرەجی، ڕاوێژکاری ئاسایشی نیشتمانیی عێراق کۆبوونەوەی لیژنەی باڵای ئەمنی کرا.

 

ڕاگەیێنراوی فەرمی: نووسینگەی ڕاگەیاندنی ڕاوێژکاری ئاسایشی نەتەوەیی عێراق ڕایگەیاند: کۆبوونەوەکە بۆ تاوتوێکردنی ئامادەکارییەکان بووە بۆ ئەو سەردانە چاوەڕوانکراوەی لیژنە باڵا ئەمنییەکە کە بڕیارە سەردانی تورکیا بکات.

 

زانیاریی زیاتر: لە کۆبوونەوەکە تاوتوێی گرنگترین پرسە ئەمنی و سەربازییە هاوبەشەکانی نێوان هەردوو وڵات کرا، ئەمە جگە لە تاوتوێکردنی پرسەکانی بەرەنگاربوونەوەی تیرۆر و هەماهەنگی نێوان هەردوولا.

 

لەلایەکی دیکە: هاکان فیدان، وەزیری دەرەوەی تورکیا ڕۆژی 9ی ئاب ڕایگەیاندبوو: چوارەمین کۆبوونەوەی میکانیزمی ئەمنیی هاوبەشی نێوان تورکیا و عێراق هەفتەی داهاتوو لە ئەنقەرە بەڕێوەدەچێت.