شانەی ئەمنیی عێراق: هیچ جموجۆڵێکی چەکدارانی داعش لە ئەنباردا نییه‌

ئاڤا نیوز

 

شانەی ڕاگەیاندنی ئەمنیی عێراق ڕەتی دەکاتەوە هیچ جموجۆڵێکی چەکدارانی داعش لە بیابانه‌كانی ئەنباردا هەبێت، هۆشداریش به‌ ده‌زگاكانی ڕاگەیاندن ده‌دات وریاتر بن لە بڵاوکردنەوەی هەواڵەکان.

 

وێنە گەورەکە: چەند ڕۆژێکە میدیا عێراقییه‌كان باسی هه‌ڵكشانی جموجوڵەکانی چه‌كدارانی داعش ده‌كه‌ن لە بیابانه‌كانی ئه‌نبار و گوایه‌ چەند هێرشێكیان کردووەتە سەر خاڵە ئەمنییەکانی سوپای عێراق له‌و ناوچانه‌دا.

 

ڕاگەیێنراوی فەرمی: شانەی ڕاگەیاندنی ئەمنیی عێراق بڵاوی كرده‌وه‌: هه‌واڵی ده‌ركه‌وتنی ژمارەیەکی زۆر لە تیرۆریستانی داعش له‌ بیابانه‌كانی ئەنبار به‌تایبه‌تی ناوچە سەختەکانی چه‌می حۆران دووره‌ له‌ڕاستییه‌وه‌، وەک هەندێک لە دەزگاکانی ڕاگەیاندن بانگەشەی بۆ دەکەن.

 

زانیاریی زیاتر: شانەی ڕاگەیاندنی ئەمنیی عێراق ئاماژه‌ی به‌وه‌ش كرد بڵاوكردنه‌وه‌ی ئه‌م جۆره‌ هه‌واڵانه‌ ڕه‌نگه‌ زه‌نگی ئاگادارکردنەوەی پێشوەختە به‌ تیرۆریستان بدات و پلانی هێزه‌ ئەمنییەکانیش ئاشکرا بکات.