بەهۆی گەندەڵی بەڕێوەبەری گشتیی پەروەردەی ئەنبار لە پۆستەکەی دوور دەخرێتەوە

ئاڤا نیوز

 

بەهۆی گەندەڵی ئیداری و دارایی و زیانگەیاندن بە بەرژەوەندیی گشتی، وەزیری پەروەردەی عێراق فەرمانێکی وزاری بۆ دەستلەکارکێشانەوە بۆ بەڕێوەبەری گشتیی پەروەردەی ئەنبار لە پۆستەکەی دەردەکات.

 

وێنە گەورەکە: لە دوای ساڵی 2003ـەوە، گەندەڵی لە عێراق بووەتە دیاردە و زۆربه‌ی دامەزراوەکانی دەوڵەتی گرتووەتەوە و ڕۆژانە چەندین بەرپرس و ئەفسەری پلە باڵا و فەرمانبەری ئاسایی لەسەر دۆسیەکانی گەندەڵی دەستگیر دەکرێن.

 

نووسراوی فەرمی: بەپێی فەرمانێکی وزاری کە کۆپییەکی دەست ئاڤا نیوز کەوتووە و واژۆی د. ئیبراهیم نامس جبووری، وەزیری پەروەردەی عێراقی لەسەرە، بڕیار دراوە بە "دەستکێشانەوە لە کارکردنی نافع حوسێن عەلی دلێمی لە بەڕێوەبەریەتیی پەروەردەی ئەنبار بۆ ماوەی 60 ڕۆژ بەو پێیەی مانەوەی لە کار زیانی بۆ بەرژەوەندی گشتی و کاریگەریی لەسەر ڕێڕەوەی لێکۆڵینەوەکان دەبێت.

 

زانیاریی زیاتر: لە فەرمانە وزارییەکەدا ئەوەش هاتووە کە بڕیارەکە پشتبەستوو بە "بە دەقی ماددە 17 لە یاسای بەرزەفتکردنی فەرمانبەرانی دەوڵەت و کەرتی گشتی و لەسەر بنەمای یاداشتی لیژنەی لێکۆڵینەوە" دەرکراوە.