فوئاد حوسێن: لە دۆخێکی مەترسیدارداین و ناوچەکە لەژێر ئاگردایە

ئاڤا نیوز

 

وەزیری دەرەوەی عێراق ڕایدەگەیێنێ، "لۆژیکی شەڕ بەسەر بارودۆخی سیاسی ناوچەکە زاڵە، ئەگەر بێت و ڕێگری لێ نەکرێت  بۆ جەنگ سەردەکێشێت. بۆیە ئێمە لە دۆخێکی مەترسیدار داین، ناوچەکە لەژێر ئاگردایە".

وێنە گەورەکە: بەهۆی فراوانبوونی شەڕی  حەماس و ئیسرائیل و زیادبوونی گرژییەکانی نێوان ئێران و ئیسرائیل،  مەترسی هەیە  جەنگێکی هەرێمی فراوان لە ڕۆژهەڵاتی ناوەڕاست هەڵبگیرسێت،  پریشکی شەڕەکەش وڵاتانی ناوچەکە دەگرێتەوە بەدیاریکراویش عێراق.

لێدوانی فەرمی: فوئاد حوسێن، وەزیری دەرەوەی عێراق لە میانی دیدارێکی تەلەڤزیۆنیدا لە کەناڵی رابیعەی عێراقی، لەبارەی ئەوەی عێراق چۆن دەتوانێت ئەوە بۆ لایەنەکان بسەلمێنێت کە بەشێک نییە لە ململانێکان؟ ڕایگەیاند: "کاتێک گرژی دەکەوێتە نێوان پەیوەندییەکانی ئێران و ئەمریکا، بەشێوەیەکی ڕاستەوخۆ یان ناڕاستەوخۆ کاریگەری دەکاتە سەر دۆخی عێراق، چ دۆخی جوگرافی بێت یان کۆمەڵایەتی و نێوخۆیی، جوگرافیای عێراقیش کەوتووەتە ئەو ناوچەیە".

 

زانیاریی زیاتر: بە ئاماژەکردن بەوەی ئاسایشی ناوچەکە، ئاسایشی هەمووانە، فوئاد حوسێن دەڵێت: "ئەگەر بێت و گرفتێکی ئەمنی هەبێت ئەوا کاریگەریی بەسەر وڵاتانی دیکە دەبێت، ڕەنگە کاریگەرییەکەی لەسەر وڵاتێک زیاتر بێت لە وڵاتێکی دیکە. بۆیە دەڵێم جوگرافیای عێراق لە ئەنجامی ئەو ململانێیەی نێوان ئەمریکا و ئێران، ئێران و ئیسرائیل، عەرەبی و ئیسرائیلی و ئیسلامی و ئیسرائیلی بێ کاریگەریی نابێت".