سەدر داوایەک ئاراستەی وڵاتانی ئەوروپا دەکات

ئاڤا نیوز  

ڕێبەری ڕەوتی نیشتیمانی شیعە داواکاری سێ دەوڵەتی ئەوروپی بۆ ڕاگرتنی شەڕی غەززە بە "درۆ و تێکەڵکردنی پرسەکان" ناو دەبات و دەڵێت "پێویستە ئەوروپا پشتیوانی دامەزراندنی دەوڵەتی فەلەستین بکات".

وێنە گەورەکە: ئەمڕۆ ئەڵمانیا و فەڕەنسا و بەریتانیا لە ڕاگەیێنراوێکی هاوبەشدا داوای دەستپێکردنەوەی دانوستانەکانیان لە حەماس و ئیسرائیل کرد، هاوکات داواشیان لە ئێران و گروپە چەکدارییەکانی نزیک لە تاران کرد لەوە زیاتر نەبنەهۆی زیادبوونی گرژییەکان لە ناوچەکەدا.

ڕاگەیێنراوی فەرمی: "ئەو سێ وڵاتە ئەوروپییە لە پەیامەکەیاندا درۆیان کردووە و پرسەکانیان تێکەڵکردووە، بۆیەش داوایان لێدەکەم دەستبەجێ هاوکارییە بێ سنورەکانیان بۆ ئیسرائیل ڕابگرن". موقتەدا سەدر ڕێبەری ڕەوتی نیشتیمانی شیعە لە پەیامێکدا وادەڵێت.

زانیاریی زیاتر:"پێویستە لەجێگەی ئەو ڕاگەیێنراوە لاوازانە، سوود لە ئەزموونی  هەندێک وڵاتی ئەوروپی وەربگرن و دان بە دەوڵەتی فەلەستیندا بنێن، هاوکات پێویستە داوای دەستبەجێ ڕاگرتنی بێ مەرجی گرژییەکانیش بکەن". سەدر وای گوت.