لە هەولێر كەسێک 150 هەزار دۆلار لە باوكی دەدزێ و لە قومار دەیدۆڕێنێ

ئاڤا نیوز 

 

پۆلیسی هەولێر ئاشكرای دەكات, كەسێكیان دەستگیركردووە 150 هەزار دۆلار (15 دەفتەر) لە باوكی دزیوە و لە قومارکردن دۆڕاندوویەتی.

 

چیرۆكی سەرەكی: تۆمەتبارەکە بە دوو جار پارەکەی لە باوکی دزیوە و دواتر دەچێتە ئێران، پاشان پۆلیسی هەولێر، لەڕێگەی تەكنیكی خۆیەوە دەیهێنێتەوە بۆ هەرێمی كوردستان و دەستگیری دەكات.

 

ڕاگەیێنراوی فەرمی: پۆلیسی هەولێر ڕایدەگەیەنێت، تۆمەتبارەكە 30 هەزار (3 دەفتەر) دۆلاری لە شوێنی کارکردنی باوکی دزیوە، پاشان لە قاسەکەی باوکی لە ماڵەوە  120 هەزار (12 دەفتەر) دۆلاری دیكەی دزیوە، سەرجەم پارەکەشی لەڕێگەی قوماری ئەلیکترۆنییەوە دۆڕاندووە.

 

ئەوەش بزانە: لە ڕۆژی 7ی ئاب  پۆلیسی هەولێر چیرۆكی دزێک ئاشكرا دەكات، دوای ئەوەی دزی لە خزمێكی خۆی كردووە، چووەتە لوبنان و دواتر بە "تەكنیكی تایبەت" هێنراوەتەوە هەولێر و دەستگیركراوە.