بەرەی تورکمانی دژی ئیدارەی نوێی کەرکووک سکاڵا تۆمار دەکات

ئاڤا نیوز

دژی پێکهێنانی حکومەتی خۆجێیی کەرکووک و پەراوێزخستنی پێکهاتەی تورکمان،  بەرەی تورکمانی لە دادگای فیدڕاڵی سکاڵای تۆمار کرد.

وێنە گەورەکە: بەگوێرەی یاسای ئەنجوومەنی پارێزگاکانی عێراق، پێویستە لە بەڕێوەبردنی پارێزگای کەرکووک بە سازانی هەرسێ پێکهاتەی کورد و تورکمان و عەرەب بڕیار بدرێت، بەرەی تورکمانی پێیوایە پەراوێزخستنیان لە ئیدارەی نوێی کەرکووک، پێچەوانەی ماددەی 13ی ئەو یاسایەیە.

لێدوانی فەرمی: محەممەد سەمعان، گوتەبێژی بەرەی تورکمانی بە ئاڤا نیوزی گوت، دژی پێکهێنانی ئیدارەی کەرکووک بەبێ بەشداری تورکمان، لە دادگای فیدڕاڵی سکاڵایان تۆمارکرد و دادگاش سکاڵاکەی قبووڵکردوون.

لەلایەکی دیکەوە: بەرەی تورکمانی کە نوێنەرایەتیی تورکمانە سوننەمەزهەکان دەکات لە پێکهێنانی حکومەتی خۆجێیی کەرکووک نیگەرانە، بەڵام کوتلەی چوارچێوەی تورکمانی کە نوێنەرایەتیی تورکمانە شیعەمەزهەبەکان دەکات لە ئیدارەی نوێی کەرکووک بەشدارن و پۆستیان پێدراوە، هەرچەندە هیچ کورسییەکیان نەهێناوە.

ئەوەی پێویستە بیزانیت: لەکۆی 42  پۆستی گرنگی کەرکووک 18 پۆست بۆ پێکهاتەی تورکمان دانراون و ئێستاش خاڵێکی دیکەی ڕێککەوتنی یەکێتی و لایەنەکان ئاشکرابووە، بەپێی ڕێککەوتنەکە پۆستی پارێزگار لەنێوان  هەرسێ پێکهاتەی کورد و تورکمان و عەرەب بە  نۆرە دەبێت و هەر یەکێکیان  ساڵێک  و چوار مانگ پۆستەکە بەڕێوەدەبەن، بەڵام بەرەی تورکمانی کە خاوەنی دوو کورسییە لەکۆی 16 کورسی ئەنجوومەنی پارێزگا، هێشتا ڕازی نییە.