خاڵێکی نوێ لە ڕێککەوتنی یەکێتی لەگەڵ لایەنەکان ئاشکرا دەبێت

ئاڤا نیوز 

 

خاڵێکی دیکەی ڕێککەوتنی نێوان یەکێتی و بەشێکی لایەنە عەرەبییەکان لەسەر پۆستی پارێزگار و سەرۆکی ئەنجوومەن ئاشکرا دەکرێت و بەپێی ڕێککەوتنەکە پۆستی پارێزگار لەنێوان کورد، تورکمان و عەرەب بە نۆرە دەبێت. 

 

وێنە گەورەکە: هەرچەندە لەکۆی 42  پۆستی گرنگی کەرکووک 18 پۆست بۆ پێکهاتەی تورکمان دانراون و ئێستاش دەرکەوتووە پۆستی پارێزگاریش وەردەگرن، بەڵام ناڕەزایەتییان لە دابەشکردنی پۆستەکان هەیە، بەنایاسایی ناوی دەبەن و ئامادەنین بەشداریی حکومەتی خۆجێیی بکەن، دوێنێ ئێوارەش خۆپێشاندانیان کرد .

 

لێدوانی فەرمی: موهەیمەن حەمدانی، کە ئەندامی عەرەبی بەشدارە لەو ڕێککەوتنەی لەنێوان یەکێتی و لایەنەکان کراوە، لە چاوپێکەوتنێکی تەلەڤزیۆنیدا ڕایگەیاند "لە هۆتێل ڕەشید لەسەر ئەوە ڕێککەوتین پۆستی پارێزگار ساڵێک و چوار مانگ بۆ یەکێتی بێت، دوای ئەوە بۆ تورکمان و دواتر بۆ پێکهاتەی عەرەب دەبێت".

 

زانیاریی زیاتر: تورکمان لەکۆی 16 کورسی خاوەنی دوو کورسی ئەنجوومەنی پارێزگای کەرکووکە، هەرچەندە بەشدارنەبوون لە ڕێککەوتنەکە و کۆبوونەوەی هۆتێل ڕەشید کە پارێزگار و سەرۆکی ئەنجوومەنی پارێزگا هەڵبژێردران، بەڵام جگە لە خولێکی پارێزگار، جێگری یەکەمی پارێزگار، جێگری سەرۆکی ئەنجوومەنی پارێزگا، بەڕێوەبەرایەتیی تەندروستی و سەرۆکی زانکۆی کەرکووک گرنگترین ئەو پۆستە ئیدارییانەن کە بۆیان دانراون.