عێراق و هەرێمی کوردستان لیژنەیەک بۆ داخستنی کەمپەکان پێکدەهێنن

ئاڤا نیوز 

سەرۆکوزەیرانی عێراق بڕیاریدا لیژنەیەک لەپێناو گەڕاندنەوەی ئاوارەکان و داخستنی تەواوەتیی کەمپەکان پێکبهێنرێت، حکومەتی هەرێمی کوردستانیش ئەندام دەبێت لەو لیژنەیە.

وێنە گەورەکە: حکومەتی عێراق هەوڵ دەدات، ئەو كەسانەی ساڵی 2014 بەهۆی داگیركردنی ناوچەكانیان لەلایەن داعشەوە ئاوارەبوون، بگەڕێنەوە زێدی خۆیان، کە بە دەیان هەزاریان لە هەرێمی کوردستانن.

لێدوانی فەرمی: ئیڤان فایەق، وەزیری کۆچ و کۆچبەرانی عێراق بە ئاژانسی فەرمی عێراقی ڕاگەیاند: محەممەد شیاع سوودانی، سەرۆکوەزیران فەرمانیکرد بە پێکهێنانی لیژنەیەک بە سەرۆکایەتی وەزارەتی کۆچ و کۆچبەران و ئەندامێتیی هەرێـمی کوردستان و نەتەوە یەکگرتووەکان و وەزارەتەکان، لەپێناو داخستنی کەمپی ئاوارەکان.

ئەوەی پێیویستە بیزانیت: وەزیری کۆچ و کۆچبەرانی عێراق، سکاڵایەکی لە دادگەی فیدراڵی تۆمارکردبوو بۆ ئەوەی لە 30ی مانگی ڕابردوو کەمپی ئاوارەکان لە هەرێمی کوردستان دابخرێن، بەڵام لە ڕۆژی 11ی ئابی 2024 دادگەی فیدراڵی سکاڵاکەی بە پووچەڵ لە قەڵەمدا.