نووری مالیکی باسی کڕینی دەنگ و کورسیی پەرلەمان دەکات

ئاڤا نیوز

 

سەرۆکی هاوپەیمانێتیی دەوڵەتی یاسا لە پەیامێکی ڤیدیۆییدا باس لە پرسی هەڵبژاردن و کڕین و فرۆشتنی دەنگ و کورسی دەکات، ئاماژە بە ڕۆڵی ڕاگەیاندنیش دەکات لەوەی دەتوانن وێنەیەکی ڕاست و دروستی ڕووداوەکان پیشانی خەڵک بدەن.

 

لێدوانی فەرمی: نووری مالیکی دەڵێت: هەڵبژاردن بنچینەیەکە کە پڕۆسەی سیاسی پشتیی پێدەبەستێت بە هەموو وردەکارییەکانیەوە، هەڵبژاردن ماف و ئەرکە، خەڵک مافی ئەوەی هەیە دەنگ بدات بەو کەسەی کە نوێنەرایەتی دەکات، ئەرکیشە چونکە هاووڵاتیان بەشێکی چالاک و گرنگن لە پرۆسەی بوونیادنانی دەوڵەت و پرۆسەی سیاسی.

 

زانیاریی زیاتر: نووری مالیکی هۆشداری لە کڕین و فرۆشتنی دەنگ دەدات و ئاماژە بۆ ئەوە دەکات، ئەگەر بێت هەڵبژاردنەکان بەو ئاراستەیە هەنگاو بنێت وەک هەندێک جار ڕووی داوە، لە ئێستاوەش ئەو کەشە بە دیار کەوتووە لە کڕین و فرۆشتنی دەنگ، لەوەش زیاتر کڕین و فرۆشتنی کورسی.

 

قووڵتر: بەگوتەی مالیکی کڕینی دەنگ مانای سەرکەوتن نییە، بەڵکو بەکارهێنانی پارەیە، بۆیە ئەگەر بێت و ئەو کەشە زاڵ بێت لە ساختەکردن و کڕین و فرۆشتن، ئەو بنچینە سەرەکییەی کە بۆ هەڵبژاردن پشتی پێدەبەستین هیچ بنەمایەکی بۆ نامێنێتەوە.

 

لەلایەکی دیکەوە: بە گوتەی سەرۆکی هاوپەیمانێتیی دەوڵەتی یاسا بێمتمانەیی خەڵک بە هەڵبژاردنەکان مەترسییەکی گەورەیە لەسەر پڕۆسەی سیاسی، باسی لە گرنگی ڕۆڵی ڕاگەیاندن کرد لە خستنەڕووی ڕاستییەکان بۆ خەڵک و هاندانیان بۆ بەشداریکردن لە هەڵبژاردن و نوێکردنەوەی کارتی دەنگدانیان. 

 

چارەسەرەکان: لەبارەی ئەو ڕۆڵەی پێویستە ڕاگەیاندن بیبینێت لە خستنەڕووی ڕاستییەکان و ڕوونکردنەوەی بۆ خەڵک، نووری مالیکی باسی یاسای باری کەسی ڕۆڵی ڕاگەیاند لەوبارەوە کرد و ڕایگەیاند: بە بڕوای من یاساکە دۆسیەیەکی یاسایی و دەستوورییە، پێویستە بە دانایی و لەسەرخۆ گفتوگۆی لەبارەوە بکرێت، پێچەوانەی باوەڕی گەل نەبێت و بگەڕێینەوە بۆ شەریعەتی ئیسلام.