لەگەڵ سێ یەكەمەكان خاوەن پێداویستییە تایبەتەكانیش دادەمەزرێن

ئاڤا نیوز

لیژنەی دارایی په‌رله‌مانی عێراق، داوای ڕاگرتنی دامەزراندن دەکات لە کەرتی گشتی بۆ ماوەی 10 ساڵ، له‌به‌رامبه‌ردا ئەنجوومەنی ڕاژه‌ی فیدراڵی ده‌ڵێت "به‌رده‌وام ده‌بین له‌ دامه‌زراندن".

وێنە گەورەکە: ئەنجوومەنی ڕاژه‌ی فیدراڵی ئاشكرایكرد به‌پێی به‌رنامه‌ی كاری خۆیان به‌رده‌وام ده‌بن له‌ دامەزراندنی سێ یه‌كه‌می زانكۆكان، خاوەن بڕوانامە باڵاکان و دەرچووانی بەشەكانی تەندروستی، گرەنتی مافی خاوەنپێداویستییە تایبه‌ته‌كانیش دەکرێت.

لێدوانی فەرمی: سەعد ئه‌للامی، بەرپرسی ڕاگەیاندنی ئەنجوومەنی ڕاژه‌ی فیدڕاڵی به‌ ئاڤا نیوزی گوت: به‌پێی فه‌رمانی وه‌زاره‌تی پلاندانان، وه‌زاره‌ته‌كانی عێراق پێویستییان به‌  80 هه‌زار پله‌ی وه‌زیفی هه‌یه‌ ، له‌نێویاندا 20 هه‌زار پله‌ی وه‌زیفی بۆ هه‌ڵگری بڕوا نامه‌ باڵاكان ده‌ستنیشان كراوه‌.

زانیاریی زیاتر: ئێستا زیاتر له‌ 30 هه‌زار پله‌ی وه‌زیفی به‌رده‌سته‌ و به‌پێی به‌رنامه‌ی كار و پێداویستی وه‌زاره‌ته‌كان به‌رده‌وام ده‌بین له‌ دامه‌زراندن. ئه‌للامی ئه‌مه‌شی گوت.

ئه‌مه‌ش بزانه‌: دامەزراندن دەرچووانی زانكۆكانی هه‌رێمی كوردستان ده‌گرێته‌وه‌، به‌و مه‌رجه‌ی دانیشتووی کەرکووک و ناوچە کوردستانییەکانی دەرەوەی ئیدارەی هەرێمی کوردستان بن.