ئەو مۆزەی ئێستا دەیخۆین مەترسی لەناوچوونی لەسەرە

ئاڤا نیوز 

 

توێژینەوەیەکی نوێ ئاماژە بە مەترسییەکانی جۆرە کەڕوویەک دەکات، کە لەوانەیە ببێتە هۆی لەناوچوونی ئەو جۆرە مۆزەی  ئێستا لە جیهاندا هەیە.

وێنە گەورەکە: توێژەران دەڵێن ئەو جۆرە مۆزەی ئەمڕۆ دەیخۆین هەمان ئەو مۆزە نییە، کە پێشتر بابو باپیرانمان دەیانخوارد، بەڵکو ئەو جۆرە مۆزە کۆنانە لەناوچوون و بوونەتە قوربانی یەکەم بڵاوبوونەوەی کەڕووی فوزاریۆم لەساڵانی  پەنجاکانی سەدەی ڕابردوودا.

ئەوەی پێویستە بیزانیت: کەڕووی فوزاریۆم دەگوازرێتەوە بۆ خاکی کشتوکاڵی و دەتوانێت زیاتر لە 100 خانەخوێی ڕووەکی جیاواز تووش بکات، بەهۆی پێکهاتەکەیەوە ڕووەکی مۆز تووشی نەخۆشی دەکات و دەیکوژێت، چونکە وادەکات ڕەگ و کۆئەندامی گواستنەوەی ڕووەکەکە نەتوانێت کانزا و ئاوە پێویستەکان هەڵبمژێت و بیانگوازێتەوە.

زانیاریی زیاتر: تا ساڵانی شەستەکان بەناوبانگترین مۆزی خواردن لە جیهاندا جۆری گرۆس میشێل بووە، بەڵام ئەم جۆرەی ئێستا لەجیهان بڵاوە پێی دەگوترێت کاڤێندیش.