فوئاد حوسێن: بە ئێران گوتراوە هەڵە دەکەن هێرش بکەنە سەر کوردستان

ئاڤا نیوز  

 

وەزیری دەرەوەی عێراق ڕایدەگەیێنێت، هەوڵە دیپلۆماسییەکانی عێراق سەرکەوتوو بوون لە ڕێگرتن لە واشنتن لە وەڵامدانەوەی بۆردومانەکانی بنکەی عەین ئەسەد، ئاماژە بۆ ئەوە دەکات بە ئێرانیان گوتووە "هەڵە دەکەن هێرش بكەنە سەر كوردستان".

وێنە گەورەکە: کاردانەوەی گرووپە چەکدارییەکانی سەر بە ئێران لە ناوچەکە لە دەرئەنجامی ململانێی نێوان ئیسرائیل و بزووتنەوەی حەماس لە فەلەستین و  و حیزبوڵڵا لە لوبنان بەسەر ناوچەکەوە دیار بووە. لە ماوەی ڕابردوودا چەند جارێک بنکە سەربازییەکانی ئەمریکا بە دیاریکراوی لە سووریا و عێراق لەلایەن ئەو گرووپانەوە کرانە ئامانج.

لێدوانی فەرمی: فوئاد حوسێن، وەزیری دەرەوەی عێراق لە چاوپێکەوتنێکدا لەگەڵ کەناڵی "عەرەبیە" جەختی لەوە کردەوە وڵاتەکەی لە ناوخۆ و دەرەوە هەنگاوی ناوە بۆ ئەوەی ڕێگری لە فراوانبوونی ململانێکان بکات، ئاماژە بۆ ئەوەش دەکات: "گفتوگۆ لەگەڵ ئێران هەیە سەبارەت بەوەی هەڵە دەكەن لەوەی هێرش بكەنە سەر كوردستان".

مەترسییەکان: وەزیری دەرەوە هۆشداریشی دا لە مەترسیی کێشکردنی عێراق بۆ نێو شەڕەکە و ئاماژە بۆ ئەوە دەکات "حكومەت پەرلەمان بڕیاری جەنگ و ئاشتییان بەدەستە".