لە فەیسبووک و ئینستاگرام بازرگانی بە ماددەی هۆشبەر دەکرێت

ئاڤا نیوز

بازرگانانی ماددەی هۆشبەر پێویستیان بە هەوڵێکی زۆر نییە بۆ ئەوەی بە نایاسایی ماددەی هۆشبەر بفرۆشن، بەڵکو ئێستا بە ئاسانی لە رێگەی ئینستاگرام و فەیسبووکەوە کارەکانیان دەكەن.

وێنە گەورەکە: لەم مانگەدا، پۆستێکی فەیسبووک بە هەژمارێکی کۆدکراوی تەلەگرام بەسترابوویەوە، کە نزیکەی 6000 فۆڵۆوەرزی هەبووە. لە هەژمارەکەدا (کۆکایین، هیرۆین، میتیلین دایۆکسی میتامفیتامین و .... هتد) و چەندین بازرگانی دیکەی نایاسایی وەک کاغەزی دراوی ساختە بە کڕیاران فرۆشراوە. 

چیرۆکی سەرەکی: رۆژنامەی تەلەگرافی بەریتانی بڵاویکردووەتەوە: بە گوێرەی لێکۆڵینەوەیەکی بنکۆڵکاری، بۆیان دەرکەوتووە تۆڕە کۆمەڵایەتییەکان بووەتە شوێنی بەبازاڕکردنی ماددە هۆشبەرەکانی وەک، (کۆکایین، ماریوانا و حەب و ماددە هۆشبەرەکانی دیکە).

ئەوەی ئێستا روودەدات: لە لێکۆڵینەوەکەی تەلەگرافدا هاتووە، لە تۆڕە کۆمەڵایەتییەکان دەیان رێکلامی جۆراو جۆر بۆ ماددە هۆشبەرەکان دەکرێن و نمایش دەکرێن، بەڵام کاتێک کڕیار دەیەوێت ماددەیەک بکرێت، ئەوا راستەوخۆ دەیگوازێتەوە بۆ ئەپلیکەیشنی تایبەتی کۆدکراو. 

لە لایەکی دیکەوە: مانگی رابردوو، راپۆرتێکی پڕۆژەی شەفافییەتی تەکنەلۆژیا (TTP) بڵاویکردووەتەوە، 450 پێگە لە ئەمریکا و بەریتانیا و وڵاتانی ئەوروپا بە ئاشکرا رێکلامیان بۆ ماددەی هۆشبەر لە ئینستاگرام و فەیسبووک کردووە.  

ئەوەی پێویستە بیزانیت: کۆمپانیای مێتا کە خاوەنداری هەردوو تۆڕی کۆمەڵایەتی فەیسبووک ئینستاگرام دەکات، رایگەیاندووە هەموو جۆرە چالاکییەکی فرۆشتنی ماددەی هۆشبەری قەدەغەکردووە.