ئەنجوومەنی وەزیران: بەرپرسیارێتی وەزارەتی دارایی عێراقە لە کاتی خۆیدا مووچە بنێرێت

ئاڤا نیوز

 

ئەنجوومەنی وەزیرانی هەرێمی کوردستان دووپاتی دەکاتەوە، بەرپرسیارێتیی وەزارەتی دارایی عێراقە مانگانە لە کاتی خۆیدا مووچەی فەرمانبەرانی هەرێمی کوردستان هاوشێوەی ناوچەکانی دیکەی عێراق بنێرێت.

وێنە گەورەكە: زیاتر لە 30 ڕۆژە، لیستی تەواوی مووچەخۆرانی هەرێم بۆ مانگی تەمموز ڕەوانە کراوە، بەڵام تا ئەمڕۆ مووچەی مانگی تەمموزی مووچەخۆرانی هەرێم خەرج نەکراوە.

ئەوەی پێویستە بیزانیت: ئەمڕۆ چوارشەممە 21ی ئابی 2024، بە سەرپەرشتیی سەرۆكوەزیران بارزانی ئەنجوومەنی وەزیرانی هەرێمی کوردستان کۆبووەوە.

ڕاگەیێنراوی فەرمی:ئەنجومەنی وەزیران دووپاتی کردەوە بەرپرسیارێتی وەزارەتی داراییی فیدڕاڵە، مانگانە لە کاتی خۆیدا مووچەی هەرێمی کوردستان، هاوشێوەی ناوچەکانی دیکەی عێراق بنێرێت.

زانیاریی زیاتر: وەزارەتی دارایی و ئابووریی هەرێم سەرجەم پابەندییەکانی خۆی جێبەجێ کردووە، نابێت بەهیچ جۆرێک هەبوونی تێبینی و سەرنج لە لایەن دیوانی چاودێریی داراییی فیدراڵ ببێتە هۆی ڕاگرتنی خەرجکردنی مووچەی تەواوی مووچەخۆرانی هەرێم.

گۆشەیەكی دیكە: دڵنیاین دیوانی چاودێریی داراییی فیدڕاڵ، بەردەوام ڕاپۆرت لەبارەی کەموکورتییەکانی ژمێریاریی دامەزراوەکانی فیدڕاڵ پێشکەش دەکەن، بەڵام هیچ کات پەنایان بۆ دواخستن و نەناردنی مووچەی مووچەخۆرانی ناوچەکانی دیکەی عێراق نەبردووە. ئەنجوومەنی وەزیران وادەڵێت.

ئەمەش بزانە: لە بڕگەی دووەمدا ڕاپۆرتێکی لەبارەی کارەکانی لیژنەی هاوبەشی حکومەتی هەرێم و حکومەتی فیدراڵ خرایەڕوو تایبەت بە یەکخستنی ڕێکار و ڕێنماییە داراییەکان، لە بڕگەی سێیەم ئەنجوومەنی وەزیران پشتیوانیی خۆی بۆ سەرخستنی پرۆسەی هەڵبژاردن  دووپات کردەوە جەختی "لە بەڕێوەبردنی هەڵبژاردنێکی بێگەرد لە کەشێکی ئارام دا" کردەوە.