چەند پەیامێک لە سەرۆک بارزانییەوە؛ نابێت هەڵبژاردن دوابخرێت

ئاڤا نیوز

 

سەرۆک بارزانی لە کۆبوونەوەیدا لەگەڵ باڵیۆزی ئەمریکا لە عێراق چەند پەیامێکی نوێی ڕاگەیاند. لەبارەی هەڵبژاردن جەختیکردەوە نابێت دەستوەردانی تێدا بکرێت و هەوڵی دواخستنی بدرێت.

چیرۆکی سەرەکی: سەرۆک مەسعود بارزانی لە سەڵاحەددین پێشوازی لە دەیڤید برگەر، باڵیۆزی ئەمریكا لە عێراق بەوەكالەت و شاندێكی یاوەری كرد، بارەگای بارزانی ڕایگەیاند: بیروڕایان لەبارەی دوایین پەرەسەندەكانی عێراق و ناوچەكە و هەڕەشەكانی تیرۆر و پەیوەندییەكانی نێوان هەولێر و بەغدا ئاڵوگۆڕ كردووە.

لێدوانی فەرمی: لە کۆبوونەوەکەدا سەرۆک بارزانی لەبارەی هەڵبژاردنی پەرلەمانی کوردستان ڕایگەیاندووە:

• پێویستە هەموو لایەک پابەندی دەستووربن و قەوارەی هەرێمی كوردستان و دامەزراوەكانی بپارێزرێن.

• نابێت بەشێوەیەكی نادەستووری دەست لە پرۆسەی یاسادانانی هەرێمی کوردستان وەربدرێت. 

• پێویستە هەڵبژاردنی پەرلەمانی كوردستان بکرێت، نابێت كۆسپی بۆ دروست بكرێت و هەوڵ بۆ دواخستنی بدرێت.

•پێكهاتەی سوننە بە لێكتێگەیشتن لەنێوان خۆیاندا لەسەر كاندیدێک ڕێک بكەون و هەموو لایەكیش بۆ سەركەوتنی پرۆسەی هەڵبژاردنی سەرۆكی ئەنجوومەنی نوێنەرانی عێراق هاوكاربن.

بابەتی ستراتیژی: ئێستا لە هەموو کاتێک زیاتر پرسی دەرکردنی هێزەکانی هاوپەیمانان لە عێراق باس دەکرێت، لەمبارەیەوە سەرۆک بارزانی ئەمانەی گوت:

• ئەم بابەتە ئەم بابەتە ئەركی پەرلەمان نییە، پرسێكی نیشتیمانییە و پەیوەست نییە تەنیا بە پێكهاتەیەكی دیاریكراو، دەبێت حکومەتی عێراق و هاوپەیمانان بە گفتوگۆ  بگەنە ڕێككەوتن و ئەنجام. 

• دەبێت هەموو پێكهاتەكانی عێراق ئەو ڕاستییە بزانن كە هێشتا هەڕەشەی تیرۆر و مەترسیی سەرهەڵدانەوەی هەر بەرقەرارە. 

• دەبێ بەرژەوەندی و سەقامگیری و ئاسایشی هەموو شوێن و پێكهاتەكانی عێراق لەبەرچاو بگیرێت.

• هەموو لایەک باش دەزانن ئەگەر ئەمریکا ڕژێمی پێشووی نەڕووخاندبا و یارمەتیی عێراقییەکانی لە پرۆسەی ئازادیی عێراق نەدابا، ئەوانەی ئێستا لە عێراق دەسەڵاتدارن هەرگیز نەیاندەتوانی حوکمی عێراق بکەن.