لەیەک دەروازەی ھەرێمی کوردستان 85 ھەزار زیارەتکار ھاتووچۆیان کردووە

ئاڤا نیوز  

بەگوێرەی دواین ئامار ، زیاتر لە سێ ملیۆن زیارەتکار لەڕێگەی دەروازەکانەوە هاتوونەتە ناوخۆی عێراق، لەو ژمارەیە بەتەنیا لە دەروازەی نێودەوڵەتی حاجی ئۆمەران 85 هەزار زیارەتکار هاتووچۆیان کردووە.

وێنە گەورەکە: ماوەی سێ ساڵە حکومەتی هەرێمی کوردستان لەڕێگەی دوو دەروازەوە خزمەتگوزاری تەندروستی و خواردن و گواستنەوە پێشکەش بە زیارەتکارانی ئێرانی دەکات.

لێدوانی فەرمی: مەسعود باتلی، سەرۆکی لیژنەی پێشوازی لە زیارەتکاران و بەڕێوەبەری دەروازەی نێودەوڵەتی حاجی ئۆمەران بە ئاڤا نیوزی ڕاگەیاند: تا 22ی مانگی ئاب، 85 هەزار گەشتیار لەڕێگەی دەروازەی حاجی ئۆمەران هاتوونەتە ناو هەرێمی کوردستان و ڕۆیشتوونەتەوە.

لە لایەکی دیکەوە: عەلائەدین ئەلقەیسی گوتەبێژی دەستەی دەروازە سنوورییەکانی عێراق بە ئاڤا نیوزی ڕاگەیاند: لەڕۆژی دەستپێکی هاتنی زیارەتکاران لە ڕۆژی شەشی ئاب تاوەکو 23ی ئاب، لە 10 دەروازەی سنووری بە حاجی ئۆمەران و باشماغەوە سێ ملیۆن و 367 هەزار و 449 زیارەتکار هاتوون، لە هەمان کاتدا دوو ملیۆن و 221 هەزار و 70 زیارەتکار ڕۆیشتوون.

باكگراوند: هەرێمی كوردستان چوار مەرزی نێودەوڵەتی و حەوت دەروازەی بازرگانی هەیە.