33 کامێرای تۆمارکردنی سەرپێچی لە شەقامەکانی هەولێر کەوتوونەتە کار

ئاڤا نیوز  

بەپێی ئەو وادەیەی هاتوچۆی هەولێر دیاریکردبوو، لە دوێنێ شەوەوە 33 کامێرای جێگیری تۆمارکردنی سەرپێچی لە شەقامەکانی هەولێر کەوتوونەتە کار و سزا تۆمار دەکەن.

وێنە گەورەکە: بەڕێوەبەرایەتی هاتوچۆی هەولێر چەند ساڵێکە لەڕێگەی دانانی کامێرای تۆمارکردنی سەرپێچی هەوڵی کەمکردنەوەی ڕووداوەکانی هاتووچۆ دەدات.

لێدوانی فەرمی: هێمن حەمەدەمین، گوتەبێژی هاتوچۆی هەولێر بە ئاڤا نیوزی ڕاگەیاند: لە کاتژمێر 12ی شەوی ڕابردووەوە ئەو کامێرانە لە چەند شوێنێکی جیاوازی هەولێر خراونەتە کار هەمان سیستمی کامێرای گەڕۆکی کۆنە، بەڵام ئێستا جێگیر کراون.

زانیاریی زیاتر: "پێشووتر خەڵک گلەیی هەبوو، کامێراکانی هاتوچۆ لە شوێنی شاراوە دادەنرێت، ئەم هەنگاوە لەپێناو ئەوەیە بە هاونیشتمانیان بڵێین کامێراکان شوێنیان دیاریکراوە، هەموو ڕۆژێکیش لە ڕادیۆی هاتوچۆ ناوی شوێنەکان دەخوێندرێتەوە " هێمن حەمەدەمین ئەمەی گوت.

ئەوەی پێویستە بیزانیت: ئاڤا نیوز زانیویەتی، هەموو ئەو کامێرانەی پێشووتر وەک کامێرای گەڕۆک لە شەقامەکان دادەنران، دەبرێنە کۆگای سەرەکی هاتوچۆی هەولێر، ئەگەر لە حاڵەتی زۆر پێویست نەبێت چیتر بەکارناهێنرێن.