سەرۆك بارزانی: بەتووندی پێداگری لە مافەكانی گەلی کوردستان دەكەین

ئاڤا نیوز

سەرۆك بارزانی لە پەیامێکدا لە ساڵیادی ئەنفالی بادینان بەتووندی پێداگری لەسەر مافە ڕەواكانی گەلی  کوردستان دەکاتەوە. بەپێویستیشی دەزانێت حکومەتی عێراق قەرەبووی قوربانییان بکاتەوە.

چیرۆکی سەرەکی: 36 ساڵ لەمەوبەر لە 25ی ئابی 1988 تاوەکو شەشی ئەیلوولی 1988، لە درێژەی زنجیرە تاوانەكانی ڕژێمی عێراق لە دژی خەڵكی كوردستان، بەشێكی زۆری ناوچە و گوندەكانی دەڤەری بادینان كەوتنە بەر شاڵاوی كیمیابارانكردن و گرتن و كوشتن و ڕاگواستن و ئەنفالکردن.

 پەیامی فەرمی: سەرۆک بارزانی لە پەیامەکەیدا دەڵێت: "لە ئەنجامی ئەو تاوانە نامرۆڤانەیە بە هەزاران هاووڵاتیی كوردستان شەهید و بێسەروشوێن و ئاوارە كران و سەدان گوندیش خاپوور بوون. ئامانجی ئەو تاوانەی ڕژێمی پێشووی عێراق شكاندنی ئیرادەی گەلی كوردستان بوو بۆ پشتیوانیكردنی شۆڕش و درێژەپێدان بە سیاسەتی گۆڕینی دیموگرافیی كوردستان".

لەلایەکی دیکەوە: سەرۆک بارزانی بەتووندی پێداگری لەسەر مافە ڕەواكانی گەلی کوردستان دەکاتەوە و دەشڵێت: "ئەو تاوانانە نابێ لەیادبكرێن و پێویستە دەوڵەتی عێراق قەرەبووی جینۆساید و تاوان و هەموو ئەو ستەمكارییانە بكات كە لەدژی میللەتەكەمان ئەنجام دراوە".