عەبدولخالق تەڵعەت: یەکێتی ئاگاداری چوونی هێزەکەی حەشدی شەعبییە بۆ کوڵەجۆ

ئاڤا نیوز

نوێنەری هەرێمی كوردستان لە هێزە هاوبەشەكانی عێراق دەڵێت، ئەگەر یەکێتی کاردانەوەی سیاسی و سەربازی بەرامبەر چوونی هێزەکەی حەشدی شەعبی بۆ سنووری گەرمیان نەبێت، مانای وایە ڕێککەوتنی لەگەڵ کردوون.

وێنە گەورەکە: جووڵەی سەرلەبەیانی ئەمڕۆی هێزێکی حەشدی شەعبی بۆ ناحیەی کوڵەجۆ لە سنووری گەرمیان و کۆنترۆڵکردنی کێڵگەیەکی نەوت کاردانەوەی فراوانی لێکەوتووەتەوە. فەرماندەکانی هێزەکە دەڵێن ڕێكکەوتنیان لەگەڵ یەکێتی کردووە و ڕاستەوخۆ قسەیان لەگەڵ بافڵ تاڵەبانی کردووە، یەکێتیش ڕەتی دەکاتەوە و دەڵێت دەبێت دەستبەجێ بکشێنەوە.

 

لێدوانی فەرمی: عەبدولخالق تەڵعەت، نوێنەری هەرێمی كوردستان لە فەرماندەیی هێزە هاوبەشەكانی عێراق بە ئاڤا نیوزی گوت: "یەکێتی ڕاستناکات کە دەڵێت هێزەکەی حەشدی شەعبی بەبێ ئاگادارکردنەوەی ئەوان هاتووە، ئەگەر وایە با بچن دەریان بکەن، ئەگەر کاردانەوەی سیاسی و سەربازییان نەبێت، بەڵگەی سەلمێنەرە کە بە ڕێککەوتن لەگەڵ یەکێتی هاتوون".

 

زانیاریی زیاتر: ئەو هێزەی ئەرکی پاراستنی سنووری ناحیەی کوڵەجۆی لەئەستۆیە سەر بە یەکەی 70ی یەکێتییە، عەبدولخالق تەڵعەت دەڵێت "بێگومان دەبێت پێشوەخت ئاگاداربووبن کە هێزەکەی حەشد بۆ ناوچەکە جووڵە دەکات". 

ئەمەش بزانە: فەرماندەیی هێزە هاوبەشەكانی عێراق ئەرکی سەرپەرشتیکردنی ناوچە کێشە لەسەرەکانە، وەک عەبدولخاڵق تەڵعەت باسی دەکات لە جووڵەی هێزەکەی حەشدی شەعبی ئاگادار نەبوون، بۆیە ئەوەی کراوە پێشێلکارییە و دەبێت لێکۆڵینەوەی لەسەر بکرێت و حکومەتی عێراق ڕوونکردنەوەی لەسەر بدات.