بەهۆی شەڕی پەکەکە و تورکیا ئاگر لە گوندێکی بەرواری باڵا کەوتەوە

ئاڤا نیوز 

 

فڕۆکەکانی تورکیا بۆردوومانی گوندی ئەلکیشکێی بەرواری باڵایان کردووە و بەهۆیەوە ئاگرێکی گەورە لە گوندەکە کەوتووەتەوە.

 

وێنە گەورەکە: ماوەی چەند ساڵێکە بەهۆی شەڕی نێوان چەکدارانی پەکەکە و سوپای تورکیا، دانیشتووانی گوندەکانی ئەو ناوچەیە ڕووبەڕووی زیانی زۆر بوونەتەوە.

 

لێدوانی فەرمی: حاجی بێتکاری، بەرپرسی لیژنەی ناوچەی پارتی لە ناحیەی کانی ماسێ بە ئاڤا نیوزی گوت: گوندنشینانی ئەلکیشکێ لە دۆخێکی مەترسیداردان و دووچاری دڵەڕاوکێ هاتوون، دوو لای گوندەکە بووەتە ئاگر و کۆنترۆڵکردنی زەحمەتە و داوای بەهاناوەچوونی خێرا دەکەن.

 

زیانە سەرەکییەکان: "ئاگر گەیشتووەتە خانووەکان و هەزاران دۆنم زەوی و دارستان سووتاون و ئەگەر بەخێرایی کۆنترۆڵی دۆخەکە نەکرێت، ڕووداوی گەورەتری لێدەکەوێتەوە" حاجی بێتکاری ئەمەی گوت.

 

ئەوەی پێویستە بیزانیت: بەهۆی ئەوەی گوندەکە کەوتووەتە ناوچەیەکی شاخاوی و ئاگرەکەش بەهێزە، تاوەکو ئێستا تیمەکانی بەرگریی شارستانی نەیانتوانیوە کۆنترۆڵی بکەن.

 

باکگراوند: گوندی ئەلکیشکێ نزیکەی 40 ماڵە و دەکەوێتە دەڤەری بەرواری باڵا لە سنووری قەزای ئامێدی لە پارێزگای دهۆک، بەهۆی شەڕ و پێکدادانی نێوان تورکیا و پەکەکە ناوە ناوە بۆردوومان دەکرێت.